大陸禁止內容敏感嘅影視動漫作品，大家都見慣不怪，而高達都叫做可以打入中國市場；不過喺日本最近就有聲音，要求停播高達系列最新作品《機動戰士高達：鐵血的孤兒》，有日本網友指動畫宣揚恐怖活動，應該要停播咁話喎。
《機動戰士高達：鐵血的孤兒》嘅劇情已進入中段，不過最近喺社交網站「Twitter」上，有日本網友指新作嘅題材具爭議性，描述身為「獨立少年軍」嘅主角們從事恐怖活動，對抗維持社會秩序嘅組織，表現唔係咁恰當；更指新作可能會誤植「對政治不滿可以用武力去解決」嘅觀念俾年齡細啲嘅觀眾。同時，認為動畫係「肯定恐怖活動」，應該加以規管。
有網民更撰寫投訴信俾「日本放送倫理・番組向上機構」（BPO）表達意見。不過呢名網民好似有好多意見，除咗高達之外，網民認為《夜之小雙俠》有同類內容，都要規管。
不過最搞笑係，喺網友眼中《頭文字D》係宣揚非法賽車；而《小熊維尼》都有問題，因為現實中熊對人類係非常危險，睇得多維尼會有誤解。另外網友仲指出，鄰近嘅中國大陸都有規管恐怖活動、反抗國家嘅暴力動畫；又話美國歐盟都對恐怖活動作出警戒。
你以為係左膠抑或當地右翼？錯喇，肯肯定係真心膠，呢位網友話為咗「平衡」、「公平」，如果提及極端恐怖組織「伊斯蘭國」（IS）係邪惡嘅節目都要規管同停播，仲援引埋日本《放送法》4條，有關播放機構播出政治不公內容。勇武有問題、和理非有問題、就咁喺街行都有問題，睇嚟香港政治同日本動畫都有啲共性。