星期日食團年飯呀，你記得呀，唔好又食美點雙輝先出現呀！個個都收曬爐，邊有人星期日番工番到9點幾架？
年近歲晚又係交成績表既時候。唔係學生家長睇你教學質素有幾高、考出黎既成績有幾好。係你人生既成績表，循例：由食團年飯開始，之後直落開年、拜年咁，由上至下；左至右將你既人生評頭品足一番。年尾團年飯係點樣都走唔甩的家族項目。恩恩從前無論用加班OT、病、開會、去飲⋯⋯總之咩原因之下，都走唔甩要食團年飯。今年放棄爭扎，乖乖出席。不過火藥味一早已送入我的鼻！
時間、場景：一星期前
恩恩媽：你可唔可以執下間房？
恩恩：過年前執！
媽：成房都係野！成地都係野！成床都係野！你究竟夜晚訓邊個位架？
恩：嗯…所以夜晚係成檯都係野。
媽：你知就好啦！
恩：都無成屋都係野…
媽：究竟有邊個會娶你呀？星期日食團年飯呀，你記得呀，唔好又食美點雙輝先出現呀！個個都收曬爐，邊有人星期日番工番到9點幾架？
恩：其實你星期日夜晚行出街，一街都係鋪頭，果d人唔係番緊工咁係做緊咩？
媽：你以家做sales咩？
恩：做sales唔好咩？
媽：總之你準時！幾多位？
恩恩舉高左一隻手指之後，恩媽便頭也不回地憤然離開了恩恩的房間。究竟佢係嬲我唔肯執房？嬲我上年食團年飯遲到？定係嬲我連續廿幾年都係舉高一隻手指呢？
話咁快，又係一大棚人食飯既時間
場景：團年飯酒樓麻將檯
時間：未入席6點幾果d時間
人物介紹：
識名親戚甲
唔識名但認得親戚乙
唔識名加唔認得的親戚丙
阿毛
識名親戚甲：上三筒
恩恩：哎！碰呀！
甲：阿恩 你究竟做緊咩？
恩：呀…碰三筒囉
唔識名但認得親戚乙：唔係呀！8嬸問你做緊咩工呀？
恩：嗯…freelancer
係隔離睇打牌既阿毛：下？咩黎架？
恩：教書呀！
甲：教書星期日要番工架咩？
乙：係囉，你地唔係好多假架咩？
恩（自摸四番）：我唔係教學校，私人補習果d
甲：下！有無搞錯？
恩：無呀8嬸！對對糊無花自摸四番！
乙：私人補習果d 邊搵到食架…屋企咁辛苦供你讀大學，正正經經搵份工唔好咩？
恩（喃喃自語）：其實我份工有幾唔正經？
－循例唔答 靜左30秒後－
唔識名加唔認得的親戚丙：阿恩呀 仲咩唔見你男朋友既？
恩：無呀 無呀 太忙
甲：忙都要拍拖結婚生仔架
丙：唔係wo 上次見到果個wo
恩：無呀 無呀 無呀…
甲：兩個人唔係開心D幸福D咩？唔好咁高要求…做女仔要識忍讓下…
恩：8嬸你結左婚幾多年呀？
甲：40幾囉
恩：咁你一定好開心好幸福喇！
做補習係唔會有花紅、雙糧、bonus、連提早收爐都唔會有。因為一放假又係各家長補堂既時機。我對親戚們對做補習有誤解已經見怪不怪，因為係呢個世代，其實你做咩工係唔重要，做後生仔既，最緊要份工搵幾錢個月；做後生女既搵幾錢都唔係重點，最緊要係你拍拖未？結婚未？地球係真係好危險的。