「我朋友話淘寶啲婚紗都好靚好多款，唔講根本唔知系淘寶貨！仲有婚紗相呢，可以搵我朋友影，佢久唔久都會周圍去影嚇相。」阿明話。
「我唔要淘寶婚紗！我唔要搵朋友用傻瓜機影婚紗相！我唔要呀！如果一生人一次嘅婚禮要搞到咁寒酸，我寧願唔結！」Ceci激氣到差啲哭出來。
「其實我都系講嚇啫，你唔使咁激動住，咁我哋錢唔多嘛，要諗諗計先得架啦。」阿明安慰Ceci。
「如果要慳，一系慳酒席啦，唔好去啲咩幾星級酒店，去酒樓。」Ceci話。
「系喎，有啲酒樓無新娘房，果只就最平啦！」阿明靈機一觸。
「嚇，咁我去邊度換衫？」Ceci好擔心咁問。
「嗯…我都唔知呀哈哈！」阿明嬉皮笑臉咁敷衍。
好多人拍拖明明好哋哋，但一開始籌備結婚就嘈交，最後仲散埋。其實好多女人都願意同男人一齊捱，只系捱過三年又三年後，女人青春唔多，就會開始害怕、動搖。
唔好怪佢哋，現實中邊個唔現實呢？良禽擇木而棲，你以為愛情真系飲水飽？咪傻啦！現實中樣樣都要錢，錢唔系萬能，但無錢就萬萬不能。結婚要錢、買樓要錢、衣食住行樣樣都系錢，連食個七仔車仔面都系錢！
拍拖初期當然平安無事，但到結婚就唔同啦，結婚系兩個家庭嘅事，仲有一大堆姨媽姑爹同學同事朋友，人人都會加把口，好似自己系婚禮嘅主角一樣。可能你會話，車，使乜理佢哋講咩啫？豬朋狗友就話可以唔理啫，阿爸阿媽外母外父呢？你系咪夠膽唔理先？
有錢唔系唔使煩，系煩少啲，因為你鍾意點就點，唔使樣樣計住計住，仲可以搵婚慶公司幫你一炮搞掂，大搞特搞都得。
朋友系攝影師嘅話，無錯系會平啲，但系影得唔好你又敢唔敢出聲話佢先？分分鐘佢話返你轉頭：「友情價，仲想點？」然後比人唱足三百六十五日，話你系個麻煩友。
每個人對結婚都有不同意見，有人覺得一生人一次，一定要盡力做到最好；有人覺得budget有限，慳得就慳，平有平結啦，例如好多嘢都可以淘寶，例如婚紗，件件差唔多啫；酒樓就搵間普通啲，無新娘房果啲，慳好多；婚紗相？自拍咪得咯。可能有人會覺得咁樣巧叻叻，諗到辦法慳返咁多，但好可惜，對於有啲人，佢寧願唔結，因為愛情唔系水，飲唔飽……
金句王
微信號：jinjuking