天寒地凍，最好系咩？一定系打邊爐。但對成班男人嚟講，全年365日，唔理凍定熱，只要可以聚埋一齊，永遠都可以打邊爐。
若然約夜晚飲酒，阿強或者都會問一句：「有冇女？冇女我放飛機。」
但一講到打邊爐，阿強只會講斬釘截鐵講句：「唔好有女！有女我放飛機。」
點解？點解一班仔打邊爐會咁爽？
好！我問你呀，食曬碟肥牛要幾耐？
話你知，如果你放啲肥牛落個窩度，而5秒之後啲牛仲響度的話，
你根本就唔系打緊邊爐，只系嘥緊啲電磁爐啲電。
咁何解你哋有5秒時間都吃唔曬啲牛？
因為啲女仔可能會問：「未熟咁點算喎！」
可怒也！平時去食西餐牛扒，你咪又系嗌5成熟！
仲會嫌人哋熟得濟，彈三彈四！
製造一種錯覺令人哋以為你真系皇帝脷，5成熟定6成熟都俾你食得出。
咁打邊爐做咩要咁堅持？你而家歧視塊肥牛呀？
而日本料理生勾勾，你都系咁食啦！根本完全唔系理由。
同時之間，成班男人，亦唔需要禮讓。
有時同啲「點頭之交」打邊爐，真系好辛苦！
因為有女在場，大家都開曬「禮讓Mode」扮有風度，計住計住，左一句「我食咗四塊啦，呢兩塊你食啦」；右一句「牛丸每人一粒，呢粒系你嘅」。
我食到差啲要打開手機個計算器app睇下7個人點平分10塊肥牛！
心諗：「打個邊爐都讓嚟讓去？」
但若然系成班仔，打邊爐就系一個戰場。
佢唔會理「熟未」，一撈吃曬十塊。
即使你一塊都冇，佢都唔會Say Sorry，只會恥笑你太低智。真心FD讓什麼？
如果你成餐飯都聽唔到一句「你食咗未。」恭喜你，呢班真系死黨。
仲有地球人最鍾意系咩？
就系圍爐取暖咯！
成檯單性生物，你想噏咩都得。溝唔到女嘅可以怨，鬧爆佢哋；有女果啲照怨，跟隊一齊鬧佢哋。
一啲你連發上朋友圈都唔敢嘅內容，只有同一班仔打邊爐先夠膽開聲。幾傻幾天真嘅話題都可以照噴出嚟，唔需要懶衛生用公筷，男人老狗一支筷子從一而終！
冇囡囡在場，男人先可以顯示最邪惡嘅一面！
所以，我覺得啲酒樓可以效法酒吧嘅Ladies night，整返個「男士欲食之夜」，只要純男人一檯，啤酒肥牛半價。我包你客似雲來，改埋個名叫「邊邊有力」，準備定上市都得。你唯一需要擔心只系會接到「噪音投訴」。
有人話成班男人打邊爐，粗口爛舌，內容毫無養份。講得啱呀，我哋就系要冇養份。
咁我哋求咩？就系俾自己弱智一晚。
因為人越大，就越明白肯同自己一齊弱智果位，先系最難得嘅老死。
金句王
微信號：jinjuking