陳松伶半億身家已經唔使做，得閒就去 gym保持住身形，話曬年過 40唔 keep好易老。
真面目 瘦唔番 隔 8年再回巢 陳松伶扮師奶唔肯增肥
都係嗰句，大台花旦唔夠貨，點都要搵人補充，最新目標原來是 44歲的陳松伶，鬆鬆姐姐 4月將返大台拍劇，暫名《師奶大翻身》，不過鬆鬆自己揸住半億身家，大台俾得雞碎酬勞，請得郁鬆鬆都未必肯任你點。
據知因為鬆鬆姐姐好鍾意個劇本，講肥師奶變索，由被老公飛，最後同有錢仔一齊，韓式橋段，師奶最愛，不過陳松伶唯一要求係唔想太肥，因為年過 44歲肥就易，瘦番就好難。對巴打嚟講，鬆鬆姐姐吸引嘅係佢自爆有 F cup囉！
44歲陳松伶自從 06年同鄭嘉穎拍完《飛短留長父子兵》後，就主力北上掘金，鬆鬆姐姐當年憑《天涯歌女》、《月兒彎彎照九州》儲落一班 fans又多 hit歌，喺大陸非常吃得開，當年一場騷都 30萬，劇集都 5萬一集，係第一批在大陸富起來的港星。 11年同細自己 9年的內地小生張鐸結婚，長駐在大陸生活。
去年 10月陳松伶重返大台上《 Sunday靚聲王》自爆仲有戲癮，據知戲劇總監曾勵珍知道後，即時做嘢，更為鬆鬆度身訂造劇本，暫名《師奶大翻身》，講肥師奶失婚，最後變索仲同有錢仔結婚。呢條橋師奶實 like，據知鬆鬆姐姐都非常鍾意，而且她最近又在港開了內衣專門店，留港時間增加，故答應 4月回巢開工。
06年同當時仲未爆紅嘅鄭嘉穎拍《飛短留長父子兵》，之後鬆鬆姐姐就返咗大陸掘金。（網上圖片）
去年 10月陳松伶上《 Sunday靚聲王》，仲自爆好有戲癮，大台聽到即刻做嘢啦。（網上圖片）
12年大台就播過倉底劇《驚艷一槍》，其實呢套劇 04年拍嘅，當年阿佘都係做女二，未做一姐，塵封多年先出土。《蘋果日報》圖片
陳松伶雖然經常運動，不過都易肥，未上大陸前就被影到佢腰間有腩肉，驚自己肥咗瘦唔番都好合理。《忽然一周》圖片 要求肥 10磅算
不過陳松伶唔係等上位姐仔任你點，據知因為劇組想佢增肥 20磅開工，拍到尾段又要減番，務求有戲劇效果，不過陳松伶年過 40想瘦真係唔易，所以要求劇組只增 10磅就算，又要求拍完索女戲份先再增肥，不過大台劇對白情節一向飛紙仔，要掉轉拍，難啲囉！
陳松伶現身為 S.Bra內衣文化老闆，當然要騷下身材，佢仲自爆有 F cup，係咪真係咁爆信住一半先，不過對巴打嚟講索師奶絕對係一個賣點。《蘋果日報》圖片
陳松伶同細佢 9年的內地小生老公張鐸相當恩愛，經常被拍得黐到實行街。《忽然一周》圖片
03年 32歲陳松伶做過皇室纖形代言人，身材勻稱，仲有馬甲綫，係 fit嘅！《忽然一周》圖片
陳松伶多在內地生活，但去年喺香港開咗鋪就多咗時間留喺香港，嚟緊 4月開劇，應該會以香港為基地。《蘋果日報》圖片 鬆鬆姐姐真經典
對巴打嚟講 44歲鬆鬆姐姐好似好久遠，但當盧海鵬、葉蘊儀都受後生仔歡迎嘅時候，有邊個敢話陳松伶唔會變成潮 icon？當年佢唔只係大台女一，唱片《天涯歌女》仲賣咗 6白金，即係 30萬隻。拍得住譚詠麟、張學友㗎。
86年同李麗珍拍《鬼馬校園》，鬆鬆姐姐戲中著一件頭泳件，當年嚟講碎料啦！《蘋果日報》圖片
89年同黎明拍《天涯歌女》，第一次拍劇就做女一，套劇爆紅，令陳松伶成為當紅女花旦。《蘋果日報》圖片
91年《月兒彎彎照九州》劇中同鄭伊健演一對，陳松伶仲唱埋主題曲，好 hit㗎！《蘋果日報》圖片