我諗，每個男人身邊，都有一個唐詩詠。
有啲鄰家女孩feel，清純無邪，做人無機心，你企喺佢身邊，就會自自然然，有股想好好保護佢嘅衝動。
你同佢好friend，會一齊食飯，一齊宵夜，一齊去旅行，但係永遠唔會撻著。
你同佢，好似總係有啲莫名嘅共鳴。佢唔開心時，最愛找你傾訴。○○年，佢拍《青春@Y2K》時，同餘文樂撻著，可惜余文樂最後移情盧巧音，你替佢不值，「咁好嘅女仔，都唔好好珍惜！」
○五年，佢同崔建邦拍拖，離離合合，你擔心，怕佢遇人不熟，佢只叫你放心。然後崔建邦多次被斷正另結新歡，你激氣，怕佢癡心錯付，佢只說對這份情有信心。
跟住○九年崔建邦被爆涉虐打「中巴」鄺敏慧，你怕唐詩詠身心也受傷，佢依然不離不棄崔建邦。你只好暗自搖頭，「正傻女！你值得擁有一個更好的男人。」
人哋永遠以為你哋係一對，但你心裏面知道，根本無可能，當朋友問到，你通常都答：「挑！係有啲好感，但我當佢係細妹嚟o架咋！」
但係問心，你係有少少鍾意佢，不過佢喺朋友面前，卻咁樣回答：「我鍾意陽光型運動型感性型開朗活潑型，總之唔係佢呢類型」。
你哋都好享受呢種感覺，一種好似男女朋友咁親密，但名義上卻叫兄妹情嘅感覺。你哋食晚飯時，佢會幫你剝埋蝦殼，仲遞埋濕紙巾畀你，你望住佢咁賢良淑德，呢一刻，你想佢做你老婆，但你喺喉嚨深處，只能夠吐出一句：「唔該阿妹！」
你知道，一旦你示愛，有啲嘢會即刻唔同咗，你隨時連細妹都無埋。
直到一日，唐詩詠同洪永城喺埋一齊，你會發覺：「原來我好鍾意唐詩詠呢個細妹。」
當睇見洪永城繼續同黃翠如玩曖昧，手拖手出騷，你直頭想殺咗佢，將佢埋喺張保仔洞。
隔咗一兩日，你睇番報紙，見到洪永城話：「我會擺和頭酒o氹番唐詩詠」，你心中，沒有微笑，沒有流淚，只隔空悻悻然說：「挑！你係至好講！」然後自己繼續飲悶酒，在剝一隻隻蝦殼。