入得大學，當然要係宿舍夜夜笙歌至為精彩。學生宿舍向來被視為大學生的世外桃源（或者叫避難所），擁有極高自由度，唔洗日日對住屋企人驚問長問短，係宿舍入面同班朋友圍威喂又渡過一晚。但理工大學校方唔係咁諗，認為學生住入宿舍，係應該好似隻小學雞咁俾人２４小時監管住，唔係就會變禽獸飛禽大咬，點解咁講？
理工宿舍既住宿規條向來諸多限制，例如禁止大型物件出入（連單車、風扇都禁）、又唔俾唔鎖門（保安會幫你鎖，咁岩出左去冇帶證就入唔返）、保安權力過大（可以隨時用萬能卡入你房，有同學試過換換下衫個保安就衝門而入），而最令人詬病既就係過左夜晚１２點之後，唔可以男！女！同！房！捉到既話就即時趕出宿舍，終身不得再報住宿舍。（仲連宿費都冇得退返）
按校方講法，禁止深夜男女同房係為左防止性騷擾，換言之就係視你班大學生係禽獸，１２點過後就會打回原形，見女（或男）就錫，仲可以穿過人地度房門自出自入添。女仔開門俾男仔入（或男仔開門俾女仔入），大家你情我願，先唔講係唔係做愛做的事啦，一班朋友夜晚想係房傾下蜜計又唔得，連清白之驅一齊做ＰＪ都難逃一劫，同人搞個生日都要出大廳，你話係咪阻礙左無數既健康兩性關係發展。
以往保安都叫隻眼開隻眼閉，冇人投訴又唔好嘈怨巴閉基本上都冇人會捉，但今年開始，學校就大力打擊男女同房，短短一個學期就趕走左廿幾三十個學生（連ＨＡＬＬ莊都未能倖免），聽聞依家保安仲會昅實走廊個ＣＣＴＶ，一見到有異性入左房就上黎捉人，搞到大家人心惶惶。
宿舍本意應該係方便學生往返學校，換言之同出面租間屋住冇分別，學生係應該撞有自主權，間房我交足租，我擺咩係度、鎖唔鎖門、俾唔俾異性入，就係我既私人事，又唔係影響你成間ＨＡＬＬ，出左咩事咪自己負責囉，大學生大部份都過１８歲係成年人啦，點解仲要俾學校剝削自主權？