異地戀既感覺，就好似得咗一種「病」，全稱：「長距離異地戀綜合併發症」。
男人成日都希望越長越好（壽命、存款位數、女友事業線、細佬…），但系有D嘢就唔系越長越好啦，比如：異地戀既距離…
「二地戀」≠「異地戀」。
我講既長距離，唔系搭公車從天河去白雲，塞車要2個鐘果種距離喔…要搭飛機果種先算「長距離」。
而呢種病既問題，可以總結為四個字「三長兩短」
所謂三長，就系：
距離長
等待長
手尾長
而兩短，即系：
相處時間短
呢段戀愛既壽命，通常都好短…
要理解呢個病，就要追溯到佢既源頭，歷史上第一對既病患者：牛郎、織女：一年先可以見一次，仲要維持幾千年。而每次見面都要D喜鵲整條橋，先能夠見到。
你好搵唔搵搵喜鵲？！喜鵲系乜嘢啊，禽鳥來噶嘛，於是班禽鳥帶咗呢個流行病來到人間…
而造成「長距離異地戀綜合併發症」既首要兩大原因，學術D既講法系：
Outersilian同埋Swuertwunki
即系：
「藕斷絲連」同埋「死唔斷氣」
病患者通常會出現5不：
把持不定
按耐不住（J J J）
思緒不寧
坐立不安
半身不遂
深度病患者仲會出現日夜顛倒、長吁短嘆、並且出現幻覺，以為佢既另外一半出現系佢面前。但系其實，果個系部電話來噶啫…
身系外國既佢，食緊義大利菜叫「Caciocavallo Podolico芝士」，配上法國既"Chateau Margaux紅酒",而你食緊中國制既腐乳，同支82年既珠江純生…
而「長距離異地戀綜合併發症」最核心既問題就系：
……
……
……
……
咪就系咁，等咯。
你睇下，你等咗4行省略號既距離都唔耐煩。但明明我哋細個果陣，等，系幸福既。
等緊放學；系你肚餓既時候，等緊媽媽煮個面俾你食；等緊遊戲loading既時候~
同樣既嘢，大個咗之後，等，就非常痛苦啦。
等放工；等你肚餓既時候，間餐廳煮個面俾你食；等遊戲loading既時候…
最痛苦莫過於，等緊對方簡訊既回復。
你明明知道呢個時候對方系訓緊覺，但你好想對方立馬復返你，所以，異地戀雙方，都會提供大量既「叫**床」服務——叫人起床！
而更痛苦既系，呢個病既唯一醫治方法都系：
等。
呢一種病，會令你更加精於數字，每日系度數，仲要等（忍）幾多日，尤其系「手術」前既幾個禮拜。而手術既費用非常昂貴，至少都系張機票既價格。
手術完後，可能會修成正果，亦都可能會慢慢變淡…
不過大家都話，呢個系一個愛情既長跑，長系長D，不過都會到終點。但系你原來唔知，仲有好多個其他對手，唔系只得你一個跑緊噶…
出邊既花花世界，咁大咁多誘惑，佢同你身處唔系同一個地方又形單影隻…大團圓結果當然系最好啦，不過最後如果冇得撿，要分開…怨？有乜好怨？日日都有人失戀噶啦，除非你系亞當同埋夏娃，都冇人俾你撿，唔通撿條蛇咩…
或者有時，放棄，都系一種擁有。
不過，最好都系：
不在乎天長地久，只但求非常就手。
祝有情人終成眷屬！
來源：微信號：let9394