曾幾何時，當你講出呢句說話：「各位，聽日放假，不如今晚出來玩通宵啦！」
你得到既回應好有可能系呢D：
「好話，記得預埋啊邊個邊個啦~」
「一齊睇波啦，今晚皇馬對巴塞喔！！」
「不如LOL啦，開黑，邊間網吧先，我早D去book機！」
「我同我阿媽講咗啦，話去你屋企一齊溫書喔，等陣佢打俾你，唔好亂講啊~」
「好話，今晚打足20圈！！」
「劈酒？未驚過你啊！」
……
咁依家呢…
「嚇…唔好啦，攰到死呀，一定頂唔順噶啦。」
「叼，聽朝睇新聞好過啦，你哋就放假，我仲要加班啊聽日…」
「去乜網吧啫，都唔知玩乜好，又多人食煙…」
「Sorry啊，我驚我男朋友唔開心啊…」
「走唔到啦，我老婆呢排心情麻麻。」
「喔，咁無計啦，再約咯…」
好記得，以前既我哋，輕易就搵到個理由出來同班朋友玩通宵，或者突然發癲想吹下水、又或者感情煩惱想搵人傾、食嘢唱K、睇波打機、飲酒、打邊爐…叼，鋤大地都可以鋤通宵啦！
朋友屋企、桌球室、網吧、酒吧、學校操場、女仔宿舍、酒店開間房（咪亂諗）…獅子山都去過玩通宵啊（仲要落雨）。
但人大咗，
好似突然無咗呢支歌仔唱。
昔日搵理由出來，依家好無耐拒絕。
當年吵住要打機既靚仔，依家變成好老公好爹地，系屋企做家務湊BB，老婆大過天；
當年通宵守住部電視機，皇馬每場必睇，考試都唔理既兄弟，依家飲幾多咖啡都唔得鳥…
當年成日掛住去網吧通宵打機既宅男，依家忙到hi咁，唔好話打機，打飛機都無時間啦…
當年成日有感情煩惱，日日叫苦既姐妹，亦都搵到一個真心愛佢既男友，千依百順；
當年唔陪佢打足八圈都唔肯放人，體力好似無極限既靚仔，而家反而系最快攰個個…
問過幾個，唔想再問，咁多人都唔出現，就算1個2個可以出來，都不如等下次齊人啦…
原來，人既年紀系同朋友既見面次數成反比…
以前，大家幾乎日日都見，多到懶得去數。
依家，一年可以見得到2、3次都偷笑啦~
見面都已經少了，更何況玩通宵呢？
回想返，上一次同朋友玩通宵，已經系一年前既事。
仲要系因為某個同學就快要移民，先可以咁齊人。果晚玩得幾盡興，好難得既畫面再次出現：
兩個男友人攰到頂唔順，迫埋梳化度訓，基*情四射。
「訓到咁樣衰既？」
「老咗啦，平時呢個時間應該落街食個早餐，返來再打幾圈。」
「叫醒佢哋咯~」
「咪住，影低PO上網先啦。」
……
越長大越孤單…你上一次同朋友玩通宵系幾時既事，你仲記得嗎？如果你仲可以無憂無慮同朋友玩通宵…
盡情享受啦！！