無線重頭劇《張保仔》喺剛過去慨星期一首播，由陳展鵬、洪永城同陳凱琳等主演，大玩穿梭時空之餘，仲用上號稱系史上最強慨電腦特技！卡士勁唔勁就見仁見智啦，電腦特技亦都…不過以呢個香港人人都識慨人物做題材，相信點都有啲吸引力。張保仔慨大名雖然人人都聽過，張保仔洞都有好多人行過，但呢位人物真實慨事跡就未必個個知。依家在下就為大家解構呢位傳奇海盜慨真實一面，認識歷史之餘又可以睇嚇大台劇集同真實歷史相差幾遠嘛！
張保之少年時代
張保仔(1786年-1822年)原名張保，新會江門人，清朝年間著名海盜。據知張保父母希望佢一直平平安安長大，所以命名單字一個「保」。而我哋廣東人喜歡喺男仔名後面加個「仔」字，「張保仔」呢個響噹噹慨大名就系咁樣得來。
張保15歲出海捕魚時為海盜紅旗幫首領鄭一擄走，不過鄭一欣賞佢慨聰明機智，所以就留佢喺身邊成為部下。但亦有一個說法系已經有老婆慨鄭一根本系一個雙性戀者，貪戀得15歲、青靚白凈慨張保，兩人仲發生埋超友誼關係(即系張保都系雙性戀)；而另外張保又同鄭一老婆(後統稱鄭一嫂)搞埋一齊，發展出一段複雜慨三角關係。不過其後鄭一出海遇上颱風溺死，於是張保就堂堂正正勾義嫂，正式成為紅旗幫揸fit人。
海盜都有俠義的
以張保仔為首慨紅旗幫海盜集團喺全盛時期有海盜近四萬人，大戰船近八百，小船逾千，系當時南中國海最強大慨武裝勢力。佢哋主要系掠劫沿海慨清朝運鹽船、又或者外國來慨貨船，唔會對一般百姓落手。因為張保仔出身貧苦，所以佢特別愛護老百姓。就算系向鄉民購買糧食，佢都會特意加倍俾錢，深受百姓愛戴。
佢又曾經同部下「立法三章」，內容大約系唔可以私自上岸，屢犯者處死；所得財物八成要歸公家所有，私吞者處死。最後，姦淫婦女者亦都系處死。張保仔海盜集團內紀律嚴明，雖然講到底佢哋都系打劫，不過都堅持只會以官府同外國人為目標，都算系有俠義精神慨海盜。
赤瀝角大戰
喺張保同鄭一嫂慨領導下，紅旗幫接連擊退清政府海軍，為清政府之大患。於是兩廣總督張百齡(一般文獻多用百齡)決定改變策略，唔同紅旗幫硬碰硬。佢將糧食由水道改為陸運，一旦發現海盜船靠岸便馬上炮轟，藉以斷絕紅旗幫的補給路線。
去到嘉慶十五年(1810年)，清軍同駐澳門葡軍派出聯合水師圍剿張保，雙方於赤瀝角(現稱赤鱲角)發生激戰，張保艦隊節節敗退，損傷慘重。
投誠後陞官兼成親
經過赤瀝角海戰後，紅旗海盜勢力大減。不久後鄭一嫂親身前往廣州跟百齡談判，而且百齡對鄭一嫂慨要求都一一答允，於是張保為首慨集團正式向清政府投誠。根據招安條件，首先張保獲封三品武官派駐澎湖，由一個海盜變成加入打擊海盜的行列，將一眾佢以前慨盟友如黃旗幫、綠旗幫等海盜殲滅，猖獗多年慨海盜勢力總算瓦解。
而百齡更加俾足面，成為張保同鄭一嫂慨證婚人，讓佢哋名正言順成為夫妻，其後二人誕下一子張玉麟。
傳奇流芳百世
張保喺澎湖任職期間突然暴斃，死因不明，傳奇一生只有短短三十多年。由於張保當年以香港為根據地，仲同海外華僑有頻繁往來，令當時荒涼慨香港島興旺起來，功勞不少。所以喺香港就有唔少傳聞系張保仔收藏寶藏慨地方，其中以長洲張保仔洞最為出名，每年都吸引唔少遊客參觀。
不過其實入過張保仔洞慨朋友都知道該處極為狹窄，就算系穿過都好辛苦，根本冇地方收藏寶物，所以相信張保仔洞只系一處用作逃避清兵或者收藏炸藥慨地方。另一個說法系，以張保仔當時慨威望連清政府都忌佢三分，又何須搵山洞避難或者收埋寶藏？所以應該都系傳說居多。