自從越野賽車手Ken Block嘅Gymkhana微電影喺YouTube爆紅，愈來愈多有拍drifting微電影嘅巴打，佢哋嘅作品都好有Ken Block Style味道，鍾意揀啲貨倉啊，碼頭啊，農莊啊，仲有好似今次呢段片嘅兩位主角（Chris Forsberg同Ryan Tuerck）咁，揀咗個棄置16年嘅舊商場，喺裡面喪「甩」。
要Drift，最好梗係揀大power「尾轆車」，Chris同Ryan各揸一部重改嘅日產370Z，呢兩部370Z唔係配原裝3.7公升V6引擎，而喺塞咗副喺北美巿場好流行嘅日產貨車Titan嘅V8引擎落去，容積有成5.6公升，再加上重改，最大馬力升至1000匹，1000匹谷曬落後轆，揸直路都未必「舞」得掂，更何況要喺個棄置商場左甩右甩。
棄置咗嘅商場，有好多狹窄行人通道同停車場上落迴旋通道，睇住Chris同Ryan兩部車拍住，由樓下甩上樓上，好有震撼力。佢兩個亦冇飛走啲「失手」鏡頭，成件事真實好多。講真，Drift點會冇掃嚇尾，撞甩呢度嗰度㗎，神仙咩！
講多無謂，自己睇片。