35歲張柏芝雖然已經帶兩囝移民新加坡，不過新聞依然不斷，繼早前再被指唔俾拉姑探孫仔之後，近日記者收到可靠消息，指柏芝老豆張仁勇（鬍鬚勇）再次欠賭債幾百萬，今次仲搬到大圍圍村避世。
曾經幫老豆還過唔少賭債的柏芝，今次堅決唔再出手，結果鬍鬚勇早前傳被債主打鑊甘，日前由友人扶住，一拐一拐步行 5分鐘到附近圍村酒樓飲茶，一代坐館 55歲鬍鬚勇因賭落難！
因欠債傳被債主痛打一身慨鬍鬚勇，用遮作拐杖更要友人扶實，恐防隨時仆親再傷啲！
位於大圍慨曾大屋， 1848年建造，數數手指已經有 166年歷史，據知鬍鬚勇今次的藏身處，亦經圍村有力人士安排。
上周三（ 20日），記者發現在江湖上曾經風光的張仁勇（鬍鬚勇）在中午約 12時，在大圍曾大屋圍村由友人扶實，一拐一拐行出村口，並步向隔離乙明邨平民酒樓，花約 5分鐘上落樓梯先飲到餐靚茶。
「出面嘢無理好耐」
約一小時後，鬍鬚勇繼續由友人扶實步行返家，期間記者上前訪問，友人即用遮擋實，粗聲粗氣說：「唔好再影喇！」經記者多番遊說，鬍鬚勇終開腔回應腳傷一事，但友人仍金睛火眼看實記者防偷拍：「只腳？無咩嘢！（柏文有冇探你？）有！（咁柏芝呢？）有慨。（傳你出面爭人幾百萬無還，所以俾人打到咁！）由得佢傳啦！（點解搬嚟呢度？）搬嚇啫，o依家一個人住，有佢（身邊友人）照顧我。（出面啲事??家點？）出面啲嘢我無理好耐喇！」
老豆匿圍村，柏芝就繼續富貴住中半山世紀大廈，不過佢仲要負擔兩個仔吃喝玩樂同埋起居飲食，又經常帶埋乖仔周遊列國，查實柏芝負擔都好大。
柏文（右）企喺鬍鬚勇嗰邊，而豪龍（左）就碼實家姐柏芝，所以由去年鬍鬚勇被揭再次欠債後，張家成員關係大不如前。
嘆茶時，鬍鬚勇仍然四圍望，不久便發現記者！
避同場
柏芝出道初期，老豆鬍鬚勇經常跟出跟入，不過此情此景喺 02年後已經冇再出現過。
傳騙財
鬍鬚勇被大字標題寫到明騙財 200萬，據知柏芝就在當時表明唔會再幫老豆還任何債務。
點幫老豆戒賭?
賭錢害人，戒賭亦唔容易，除咗下列吹水建議外，認真慨就有政府戒賭熱線發言人就話：「首要建立健康生活模式，嚴重時有需要見精神科醫生，家人同朋友支持都好重要！」
鎖鐵閘
將鐵閘上鎖鏈，老豆被困屋內，無得出街即系無得去麻雀館、過大海啦，咁樣困住佢應該可以頂得嚇！不過爸爸會唔會報警話你非法禁錮就閣下自理喇！
禁上網
家陣科技發達，要賭已經唔使出門口都可以賭到你破產。上網買馬、買波話咁易，所以第三個方法，系要將屋企所有通訊工具沒收，凈系睇嚇電視，聽嚇收音機咪幾好！
信耶穌
教會永遠都系導人向善，無論你本身系咪教徒都好，有個爛賭爸爸，試嚇帶佢返教會，感化嚇佢，他日可能佢會放棄過澳門而選擇返教會，阿門！