第 18 屆五中全會通過全面實施「二孩政策」，換言之已在中國推行三十多年的「一孩政策」正式成為歷史。
連想生多個都唔俾，也難怪以往「一孩政策」常被指違反人權自由，不過雖然這「惡法」已同各位國內同胞講拜拜，大陸其實還有甚麼其他「獨特」法例或規定？以下就跟大家分享 7 條中國各地的騎呢法規！
1) 斑馬線唔准停車
大家都知司機應在斑馬線前停車，讓行人過馬路，以保安全，但《北京市道路交通管理規定》第 11 條卻禁止機動車輛在斑馬線停車，否則盛惠 50-200 人仔。
難怪每次返大陸過斑馬線，啲司機同志都老奉唔讓，原來犯法架！（小編明佢原意係唔想啲車塞住斑馬線，但都可以寫好啲囉～）
2) 一年必須抽 23000 條煙
2009 年，湖北公安縣訂立了《章田寺鄉公務用煙管理法》，規定所有單位（包括企業）每年必須抽掉 400 條煙，亦即全鄉每年合共要抽 23000 條煙（條喎，唔係包喎！）
唔想肺癌得唔得？得，扣錢囉！管理法同時規定，若有單位未完成「用煙計劃」，財政部門將直接依額扣減該單位的經費。真係抽又死，唔抽又死！
3) 嚴禁喺喪禮跳脫衣舞
有留意內地新聞的朋友，相信都記得今年 4 月的有關報道。這法例本身並不騎呢，騎呢的是這法例存在的原因：點解大陸會有咁多人喺喪禮跳脫衣舞!?
4) 廣告嚴禁玩食字
食字咁有益身心嘅活動都要禁？無錯，根據內地廣告條例，任何電視廣告甚至街上的廣告牌也不得「故意使用錯別字或用諧音亂改成語」（當局點證明是否「故意」食字???）
其實有關規定早在十多年前已存在，只是執法部門多數隻眼開隻眼閉，據說近年再度嚴打，是因某領導人的名字被食到應一應所致（恕小編不予置評，因為「禁評」嘛，咳咳...）
5) 禁止個名叫阿Ｃ
球迷應知道「Ｃ」是Ｃ朗的名字，「朗」才是姓氏，但這國際球星來到中國一樣無運行，因為在這國家是不准叫阿Ｃ的。
話說中國真的曾有個人叫「趙Ｃ」，亦成功取得身份證，奇就奇在他要換證時，有關部門才覺得這名字大有問題（第二次先覺!?），仲逼佢改名。那阿Ｃ老豆為甚麼會取這名字？是否崇洋賣國？錯了，原來是因為「China」以「Ｃ」開頭，所以係愛國至真！
6) 學童須向所有汽車行禮
這是貴州省黃平縣教育局多年前的規定，所有中小學生都要遵守，目的是讓學童多留心路過的車輛，減少意外，順道學習禮儀，向司機表示尊重咁話。
強迫敬禮是為了減少意外？如果班細路咁聽話，何不索性叫他們小心交通？