呢排成日聽到有人受騙，當中電話騙案層出不窮，唔少老人家都俾騙徒呃咗好多錢，連徐淑敏（Suki）都收過呢啲「電話」。
話說Suki日前喺屋企，突然家中電話響，佢就接聽嗰陣，有一個自稱系速遞員慨女子，聲稱Suki有一個包裹，包裹裡面有13張信用卡，其中有兩張系假卡，仲話香港海關已經好關注呢件包裹，為免海關上門拉人，叫佢最好攞張信用卡出嚟對一下資料。
不過當Suki就答：「我系海關關員工會會長，會同海關跟進呢件事，不如你先留低姓名。」該名女子即話嚇到收線，從此冇再打嚟！
問Suki點解咁醒知道系電話騙案，佢笑笑口講：「無端端點會有人寄咁多信用卡俾我，而且系有假卡都冇理由速遞員搵我，而且要對我信用卡資料更奇怪，如果真系牽涉海關，咁我又系海關關員工會會長，我自己都會去跟進，真系唔關速遞公司事，佢見到冇中招，所以咪收線囉！依家咁多老人家俾電話騙徒呃咗咁多錢，我都替佢哋心痛。我都要提醒長輩，唔好理呢啲電話，有乜事都要同我哋商量。」
另外，周日佢同老公黃浩喺屋企請陳智燊、宋熙年食飯，賀佢兩位就快拉埋天窗，當晚沈卓盈都有嚟做陪客，黃浩更親自下廚煮幾味，仲將照片放喺facebook，Suki仲幫老公抹汗曬恩愛。