曾四奪NBA總冠軍慨湖人名宿 「巨無霸」奧尼爾（Shaquille O'Neal），噚日抵港，準備今日喺灣仔修頓上演的表演賽。
今午一點左右，奧尼爾同女友由地膽方力申合共四名香港友人陪同下，去到旺角廣華街附近一間手板模型商店睇嘢，原來店內有佢慨figure陳列，奧尼爾大感興趣，入咗去睇，同行仲有數名外籍友人，吸引不少人門外集郵。
方力申就話，咁啱今日去奧尼爾下榻慨酒店見朋友，遇到佢，於是一盡地主之宜。奧尼爾話想去一啲較富香港道地特色慨地方，於是方力申就帶佢行旺角，依家落緊去行女人街。方力申仲好細心咁，買咗把「廢青扇」送俾奧尼爾，等佢行得舒服啲。
落到女人街，奧尼爾即刻有斬獲：$240三副太陽眼鏡，當然有價講，不過系由翻譯代勞，平咗10蚊，原價$250，奧尼爾自己扲荷包俾錢。期間不斷有人集郵，期間實在太多人，女人街檔口又窄，迫下迫下女友就唔見咗，最後要奧尼爾自己開聲，叫個女人讓開，俾番條路女友返嚟佢身邊，兩人仲甜蜜咀嘴，大曬恩愛。
期間有一個賣底底慨檔主，心生一計拎咗條加大碼底底，擺喺奧尼斯慨——心口度，話想送俾佢，但奧尼爾都唔敢接。