明白的，明白愛國溫真係真係唔想再喺香港嘅娛樂版出現，依家背靠13億人民，目標大得多。亦因為家陣愛國溫背負13億人民娛樂之需要，所以，依家佢絕對有資格(佢個人係咁認為)，為13億內地人民，向外國勢力——麥當勞，取回一個公道。
如題。溫兆倫今午喺微博，貼咗幾張圖，頭4張，都係麥記魚柳bell——犀利喇，個包表面係好飽滿嘅，仲有半塊芝士溢出嚟——溫兆倫一打開包皮，嘩，得半塊芝士？嬲到，感覺受騙了！
溫兆倫即刻買另外一家內地快餐店出品嘅魚柳包，人家，是一整片芝士。溫兆倫就話喇:「我這一輩子最痛恨的就是被欺騙！MDL快餐廳，枉費我追隨著你的魚柳漢堡30多年，如今被我發現你故意把那半薄片芝士放在的邊緣偽裝成濃厚到快溢出來的樣子；跟真才實料的HBW快餐廳同樣的魚堡有著天與地之別。我和家人，身邊的朋友，從此跟你一刀兩斷；你不只欺騙了我的傻還毀掉中國人對你的信任。」……
唔……即係咁，溫兆倫食咗30幾年麥記魚柳包，都竟然發現唔到原來芝士得半片…其實，早於8年前，香港網民已經爭拗過呢個問題——有市民一次幫襯麥記，買魚柳bell chan，驚見芝士得半塊，相信喺嗰個moment，佢嘅感覺，同溫兆倫依家一樣。該名市民指，明明以前係成塊芝士0架嘛，點解依家得半塊？？？點解嘅點解嘅點解嘅點解嘅？當時《蘋果》都有follow，問10位朋友，10個答案都係一塊。不過麥當勞就堅稱賣魚柳bell超過30年，都只係提供半塊芝士。
但係呢，8年喇，網民仍然為魚柳bell究竟係從來都只得半塊芝士，定係一塊「完璧」爭論不休，所以去年香港麥記官網新增「麥當勞食品知多點」欄目，再次解釋魚柳bell自1975年在港推出後，一直以半塊芝士製作，強調「全球份量相同」。但亦有自稱麥記前員工表示，82年做暑期工嗰陣，已經係半塊芝士；又有網民引用加拿大麥記網站2012年嘅解釋，稱使用半塊芝士係希望「食材味道完美平衡」。
可能你個心會諗，半塊芝士係為咗令食材味道完美平衡？溫兆倫same same，因為呢個名為「麥當勞顧客關懷中心」微博回覆溫兆倫fans(為偶像尋公道好平常)話，為咗唔好搶走魚柳bell嘅味道，所以用半片芝士……
自覺感情再次受騙嘅溫兆倫，見麥記咁覆，更感心痛，話:「有一句話說：我一個人傻就算了，別把13億中國人都當傻子好不好？貴公司這樣的解釋，你們先問問權威專家認不認同你們的說法吧！別越描越黑了！我到現在真心的覺得自己是真夠傻了！」
其實……得閒上一上網，就不用被騙了30多年……至少，早8年知道真相都好吖…
首先，溫兆倫俾大家睇個盒
芝士溢出
溫兆倫怒轟:「枉費我追隨著你的魚柳漢堡30多年，如今被我發現你故意把那半薄片芝士放在的邊緣偽裝成濃厚到快溢出來的樣子！」
溫兆倫買埋內地一家快餐店嘅魚柳bell比較，人家可是一塊芝士呀！
麥當勞顧客關懷中心微博溫馨回應…
其實早於07年，香港麥記已經解釋咗，一直都係用半塊芝士…
呢個得三分之一芝士，太離譜。