你話我老屎忽都好，但今日新嚟個Fresh Grad真係得啖笑。
今朝落大雨，咁大個人都唔記得帶遮，一番到黎成隻落湯雞咁搞到成地濕曬，清潔阿姐嘈曬鬼，佢仲乜事都無咁除鞋倒啲水， 大佬，地氈嚟㗎，然後竟然除埋襪抹腳。
然後HR帶佢行下間公司，佢全程仲望住手機，大粒佬同佢講野個時都唔多應人，擔天望地，嫌人地煩比番面口佢地睇轉頭，夠膽得罪方丈，真係勇氣可加。
下一個得罪嘅就係IT部同事，一坐埋位又話個mon太細可唔可以換，開咗機知道係行window，就話自己慣咗用Macbook，一定要換，但我地公司上上下下都係用window，邊搵到部mac畀你，咁佢就黑曬面咁答：「是但啦咁」，仲口upup話部機慢，好似人地欠咗佢咁，然後又嘈個Keyboard太細，如果係咁打字會好辛苦，後尾仲要求加ram，全程撟住手大大聲，當個IT同事係下屬咁呼呼喝喝。
佢一坐低，可能想主動啲，就係咁撩隔離位啲同事(其中一個係我)，又問有無拍拖，做咗幾多年，平日lunch食飯定帶飯，一朝早忙到死，食咩關你鬼事咩，煮埋畀你好唔好？
lunch time食飯先係重點，team head見有新仔，就帶我地幾個去飲茶當迎新，有人講笑話盡情嗌啦，佢真係拎住張點心紙自己發板，最精警係有個肥肥地既女同事話想食牛肉球，佢說笑曬咁話：「你成個ball咁真係岩曬食牛肉球喇！」最後無比呀head睇睇就畀左個阿姐，好彩佢未蠢到嗌灌湯餃，不過肥肥地個同事無啦啦比佢窒左窒就無曬胃口，teamhead黑面，成檯都好dead air。
下晝佢開始做野，做得好唔好唔知，見佢一臉熱誠，朝早既野當細路仔唔識野啦，衷心祝佢無風無浪捱到收工，但最尾五分鐘真係出事，個director出嚟問佢做成點，慣唔慣，佢好大聲咁話：「張生，你唔記得拉褲鏈呀！」
成個畫面，真係仲唔敢睇過關家姐，大家都扮聽唔到睇唔到。
最後呢個新仔哼住歌執野走，笑住咁同我講聽日見。
希望佢聽日表現好啲，唔係都應該都過唔到試用期架喇……
God Bless all Fresh Grad，做野無經驗唔緊要，但真係要學下點做人。