嚟到京都想一次過爆食同爆買，去位於錦市場附近嘅「新京極商店街」就啱哂，呢度係四條最熱鬧嘅商店街之一，更加係繼淺草仲見世通後全日本第二古老嘅商店街，集結過百間店舖，絕對可以滿足為食又愛買嘅你！
為大家精選9間心水店舖，想再深入啲慢慢行記得一定要預鬆啲時間。
1）超可愛冬甩專門店：本輪菓
一見到冰櫃入面放滿哂造型可愛嘅冬甩就知道已經到咗冬甩專門店「本輪菓」！「本輪菓」係一間冬甩專門店，創業於2002年，冬甩造型多以動物主題為主，仲不時會推出限定款式，絕對係影相呃like必備之品！
本輪菓 京都本店
地址：京都府京都市中京區新京極通四條上る中之町565
電話：075-256-8778
營業時間：11:00～21:00
官網：www.nature-doughnuts.jp/shop/054_honwakakyoto.htm
2）掃傳統手信必到：井筒八ツ橋本舗 京極一番街店
「八ッ橋」呢種和菓子係關西必掃嘅手信之一，所以隨街都可以見到售賣八ッ橋嘅店舖。「井筒八ッ橋本舗」亦係其中一間可以買到不同口味嘅八ッ橋嘅店舖，不過更特別嘅係2樓設有體驗教室，係京都唯一一間可以體驗製作呢個充滿古早嘅嘅和菓子嘅地方，將親手製作嘅八ッ橋送俾人做手信，係咪誠意滿分先！
井筒八ツ橋本舗 京極一番街店
地址：京都府京都市中京區寺町通錦下ル
電話：075-255-2121
營業時間：10:00～20:00
體驗費用：¥1,080
官網：yatsuhashi.co.jp
3）和式小物專門店：京極 井和井
喜愛和式雜貨的話一定要嚟呢間「京極 井和井」走一轉，因為呢度有大量日式文藝小品，例如散子包、摺扇、裝飾擺設等等，要認真研究真係要花上好一段時間！唔單止非常適合用嚟做手信，買返去放喺屋企一樣可以為室內添上幾分格調！
京極井和井・アンティーク井和井
地址：京都市中京區新京極四條上ル
電話：075-221-0314
營業時間：10：30～21：00
官網：kyoto-iwai.co.jp
4）超吸睛蛋包飯：Restaurant Star
如果處於肚餓狀態又剛好行經呢間蛋包飯專門店「STAR」，應該十個有九個都會認唔住停低腳步研究一下有咩好野食！睇到廚窗內有咁多不同款式嘅蛋包飯同洋式料理，真係估唔到呢度竟然係已經有近百年歷史嘅老店！呢度嘅蛋包飯份量夠大係意料之內，最正嘅係炒蛋都好厚身，加埋秘製醬汁，一個人都輕易KO哂成個飯。
京都洋食 レストランスター 京極店
地址：京都府京都市中京區新京極通四條上ル西側
電話：075-221-2555
營業時間：11:30～22:00
官網：http://www.star-kyoto.co.jp/restaurant/shop-7/
5）可能會令你變聰明的神社：錦天滿宮
行行嚇見到神社毋須大驚小怪，呢度係祭祀學問之神菅原道真公嘅「錦天滿宮」，雖然係分社，但由於位於超熱鬧嘅河原町，所以香火非常鼎盛。範圍內有一座銅牛像，相傳摸多兩嚇會令人更聰明，見到的話你知點做啦！如果身邊仲有親朋戚友在學，不妨為佢地求返個學業御守。
錦天滿宮
地址：京都市中京區新京極通り四條上る中之町537番地
電話：075-257-0101
營業時間：8:00～20:00
6）即製熱辣辣煎餅：蛸益章魚燒
章魚燒食就食得，但你又有冇試過煎餅夾住章魚燒嘅食法？塗滿醬汁嘅煎餅夾住兩粒熱辣辣軟綿綿嘅章魚燒，係掃街必試之選，愛重口味嘅你一定喜歡！
蛸益
地址：京都府京都市中京區新京極蛸薬師東側町501-6
電話：075-231-3463
7）掃街必試甜品及飲品：Tapioca Beliza
一心嚟掃街的話又點可以唔買返杯飲品邊行邊飲！呢度雖然以珍珠奶茶等加入咗珍珠嘅飲品為主，但由於珍珠係以日本國產木薯粉整成，而且有好多不同款式選擇，所以都值得一試。除咗飲品之外，推介大家可以試埋加入咗京抹茶製作嘅軟雪糕等甜品。
タピオカベリーズ 新京極店
地址：京都府京都市中京區桜之町419-3
電話：075-746-2337
營業時間：11:00～20:00
官網：tapiocabelize.jp
8）筷子專門店：箸ギャラリー門
筷子絕對係一份唔錯嘅手信，慳位之餘款式仲充滿日本味道，如果真係打算買多兩對做手信或自用留念，咁就一定要嚟呢間筷子老舖「箸ギャラリー門」，店內有超過1,800款不衕產地、材質、形狀衕款式嘅筷子，要認真揀真係有排揀！
箸ギャラリー門
地址：京都市中京區新京極通三條下る桜之町406-3
電話：075-252-1284
營業時間：星期一至六 09:30～21:00、星期日及公眾假期09:30～20:00
官網：www.hashi-gallery-mon.jp
9）平民海鮮丼：若狹家 三條店
若狹家喺日本有多間分店，店內主要提供可以自由選擇食材嘅海鮮丼飯，最緊要係價錢唔貴得嚟質素一啲都唔差，係一間試過一次會心思思想食第二次嘅食店！如果有選擇困難症樣樣食材都想食唔知點揀，店內亦有已為大家定好嘅menu，必試超鮮甜海膽，加多3種食材都只係一千多円，幾抵食！
若狹家
地址：京都府京都市中京區新京極通六角上る桜之町418-3
電話：075-254-5151
各店位置圖