近排每到星期日就會有TVB劇集《同盟》嘅宣傳活動，今日亦唔例外，早前遠赴澳洲兩星期拍攝節目嘅胡定欣同姚子羚今次終於回歸，一齊同鮑起靜、陳展鵬及陳山聰等《同盟》演員現身馬鞍山同粉絲見面！呢套劇一播出唔少觀眾都同去年嘅《城寨英雄》比較，定欣就話拍《同盟》辛苦勁多：「之前係功夫，又巴西柔術又MMA又槍，全部由零開始學過，所以今次係進化版嘅刁蘭。」
胡定欣同陳展鵬今日於《同盟》宣傳活動上，玩遊戲玩到好激烈。
提到上星期四嗰集，影到定欣打到周身瘀，真係見到都心痛，她笑言拍嘅時候係有用化妝品遮蓋，「但係水入面沖衝下就無曬，但有瘀痕起碼證明我有拍過動作戲先喇。」定欣坦言當時拍攝嘅時候都好氣餒，「我可以話《同盟》入面有95%嘅動作都係親身上陣，好多時候動作做極都唔好，就會有力不從心嘅感覺。」
定欣話唔想再回答有關劇集嘅題外話，即係同陳展鵬嘅緋聞。
她指自己都有好大進步空間，至於係咪想朝「打女」進發？定欣就認為，「無話我想唔想做打女，而係我覺得如果觀眾覺得我適合handle呢啲角色，其實我係好開心去迎接呢啲挑戰。」其後續道，「入行10幾年，可能有好多監製都見到我有舞蹈底子，都會加入一些動作嘅元素晌我角色。但挑戰一次比一次大，我又學咗好多新嘢，都覺得好過癮。」定欣坦言今次角色比刁蘭瘋狂，唔怕外界將兩個角色比較，「大家會睇到動作比上次難度高，觀眾都見到唔同嘅演繹方法，始終背景年代都唔同。」
-----------------------------------------------------------------------------------------------------------------------------------------------