最近，我突然發現一樣嘢，TVB其實系一個連環「車禍」現場！
講嘅系TVB從演員、角色、情節通通都可以「撞車」！聽唔明唔緊要，睇完你就明啦！
一個男人的死詩：同一演員同一劇情同一日連環撞車
好多人都知道呢個經典案例——演員羅樂林「一日之內死五次」，經典到連外國媒體都報道呢件事！
2011年4月6日起，羅樂林飾演嘅角色就接連喺多部電視劇中「賣鹹鴨蛋」！
從4月6號晚20:30嘅《洪武三十二》，同晚播出嘅《女拳》同《七號差館》，到7號重播嘅《布衣神相》、《皆大歡喜》，羅樂林分別死咗五次，仲要五種死法唔重複！
「一日之內死五次」，呢啲咁不可思議嘅事，真系只此一家，別無分號。據說當年新聞好多人關注，令到TVB高層考慮過將此次事件申請入金氏世界紀錄大全。
穿越時空之奸神：同一演員同一劇情同一晚撞車
比羅樂林「一日之內死五次」更慘嘅，系一晚之內連續強女干兩個女性！
TVB有個演員叫黃煒溏，睇相你肯定知道系邊個。
由於相貌比較凶神惡煞，所以佢經常飾演奸角、罪犯、黑社會等反面角色。
就喺2014年10月，TVB播緊《大藥坊》同《再戰明天》，兩部戲同一晚竟然都有強暴戲份，而強暴角色都系黃煒溏出演！
8點半《大藥坊》，高海寧飾演嘅酒館老闆娘，慘遭黃煒溏強暴，然後9點半嘅《再戰明天》，石天欣喺戲中被飾演繼父嘅黃煒溏強暴。
其實黃煒溏之前喺《巨輪》都強暴過石天欣，今鋪真系原班人馬激情出演！
同一晚連續兩齣戲有強暴情節已經夠離奇，估唔到「強暴犯」仲要系同一個人，搞到黃煒溏得到「萬年強 姦犯」嘅稱號。
咁啱得咁橋，輪流畀人標：同一套戲一晚三場綁架
唔知大家仲記唔記得前兩年嘅一部「神劇」——《神鎗狙擊》，內容浮誇，劇情眾多BUG，演員尷尬，特效又極其水。
當年徐子珊呢幕爆炸飛身圖，畀人P咗好多個版本
咁都唔系最經典，9月23號播出嘅時候，《神鎗狙擊》竟然一個鐘頭內有三場綁架戲！
周海媚同楊愛瑾兩姐妹，輪流被人標參，搞到我都想叫啲綁匪直接撕票啦，咪鬼浪費我時間！
仲有一件事，當晚播出嘅《巨輪》，同樣有綁架戲，綁架對象系鍾嘉欣同蕭正楠。
最橋嘅系，兩套戲綁匪都系四個人，贖款都系五千萬（不過一個系美金一個系港幣），令人懷疑兩部戲系咪同一個時空，同一班綁匪客串！
仲有，近幾年TVB配角撞車非常常見，同一晚播出嘅兩套劇集，配角來來去去都系嗰啲人，越睇越連戲！
《回到三國》之《護花危情》：唔同劇集，演員重複率極其高
《回到三國》同《護花危情》嘅演員堪稱連環撞車現場，好似一班三國人投胎到現代咁，當時追劇追到我蒙查查！
《回到三國》嘅劉關張三兄弟，去到《叛逃》竟然都系飾演組織成員，一齊殺死羅樂林（《三國》中飾演曹操），被戲稱為「劉關張轉世殺曹操」。
愛你變成殺死你：同一演員唔同命運
情侶檔唔可怕，最可怕嘅系唔同劇集就反目嘅情侶檔！
馬國明同陳法拉，喺唐朝嘅《公主嫁到》中飾演夫妻，但到咗民初嘅《女拳》，陳法拉拒絕馬國明嘅追求，最後兩人反目。
又比如，《女拳》中黃宗澤同陳法拉系夫妻，但到咗《潛行狙擊》，跛co害死咗Madam Jo！！！
觀眾：你做咩懟你老婆啊！
祝天下情人終成母子：同一演員唔同關係身份
馬國明同楊怡嘅身份都好撲朔迷離，《回到三國》同《On Call 36小時》中，佢哋系情侶。
但到咗《鐵馬尋橋》同《名媛望族》中，佢哋就變成「母子」關係。
一件頭叫魚仔做阿媽，我點睇都覺得怪咯！
時間關係，仲有好多TVB撞車事故冇辦法講到，比如一年中三次風嘅潘志文，演完清朝順治帝再演道光帝、自己演自己後代嘅陳錦鴻等。
由於演員不足，編劇能力低，TVB嘅「撞車」越嚟越頻繁，令觀眾感覺到疲倦！
作為TVB嘅忠實fans，我都系希望TVB以後「爭氣啲」，認真製作劇集，內部唔好成日掛住斗生斗死！
各位自己友，你哋最深印象嘅「車禍」又系咩？
你睇邊部劇試過連戲好嚴重？