自本田上代Civic Type R（FK2）推出，已經有唔少人問：「會唔會出自動波？」
通常呢類巴打有咁嘅問題，肯定會畀手波忠實信徒鬧：「揸Type R梗係揀棍仔啦，咁鍾意自動波，返屋企打機啦，阻頭阻勢。」
喂！問嚇啫，唔使咁滾嘅，大家需求唔同嘛，體貼啲去睇，有啲Honda迷年紀大咗少少，真係想搵部易揸少少嘅快車玩嚇，但個心又放唔低Type R，有咁諗法都正常嘅。
事實上，本田亦好想擴大Type R用家層面，最新一代（第十代）Civic動力系統工程師松持祐司（Yuji Matsumochi），最近接受澳洲傳媒訪問時承認，廠方的確有諗過同試圖將傳統扭力轉換器型自動波，同雙離合器自動波箱放到Civic Type R。
但松持祐司話，Civic Type R係前驅車，而2公升直四Turbo引擎亦稍重，如果再配搭自動波箱，車頭將會更重、更大份。睇返最新Civic Type R嘅動力重量比，頭62.5%、後37.5%，呢個比例比上代嘅（頭65%、後35%）稍有改善，能夠有咁嘅改善，本田已經耗費大量人力物力，難怪松持祐司話，佢哋最後都打消咗「自皮梯丫佬」嘅念頭，以附有自動補油功能嘅6速手動波箱，方便用家。
咁牙，食返啲補充劑補補膝頭囉。
上世紀90年代係日本跑車嘅火紅年代，Honda「Type R」系列嘅大名更加係家傳戶曉。眾多「Type R」車系中，以Civic Type R最膽正命平，車輕、高轉引擎、好彎，早已成為Civic Type R嘅代名詞，一度成為朝拜神車！
由1997年第1代Civic Type R至今歷時18年，正好18年後又一條好漢！第4代Civic Type R只不過剛剛日本推出，香港代理已率先引入，而且係多年來第一款行貨Type R。
究竟最新一代Civic Type R進化到乜嘢地步？仲係唔係停留MK車神階段？唔使估估嚇嘞！
《搵車快線》搵嚟歷代Civic Type R同場現身，睇嚇新一代有幾堅！
全新一代編號FK2嘅Civic Type R，其實只係今年3月先喺日內瓦車展展出，仍然由英國Honda製造，
所以日本市場都要喺剛剛舉行嘅東京車展上先現身，而且日本只有750部限量發售，
香港代理快人一步，年中已收訂，據知首批車主喺聖誕前就有新車揸，而我哋《搵車快線》更加喺10月中已經試車。
睇到報導先打算買車？唯有排2016年quota嘞！