東區區議會黎志強在facebook貼出求情信，指近日收到75歲朱婆婆請求，向法庭就其「無牌販賣」求情；朱婆婆早前曾於中環碼頭執紙皮維生，惟最終被食環職員控告她無牌販賣，「對方話『你賣一蚊都係無牌小販』，黎批評食環署執法過嚴、不近人情，「令人覺得個社會好涼薄」。
黎志強指，日前收到朱婆婆求助，央求他撰寫法庭求情信；黎指，朱婆婆年屆75歲，獨居於柴灣興華邨，雖然家貧，惟因不願領取綜援，故向朋友藉手推車，以執拾並轉售紙皮賺取生活費，「婆婆話當日佢喺中環碼頭近摩天輪一帶執紙皮，執咗幾個，突然有人話要同佢買幾個紙皮盒，咁婆婆無乜所謂，就按對方要求賣一蚊」。
黎引述朱婆婆所言，當日甫賣出紙皮即有食環職員現身，並控告她無牌販賣，「婆婆無辦法，因為現場人贓並獲，百詞莫辯，雖然都有向食環求情，但對方就話『你賣一蚊都係無牌小販』」，又指其手推車及紙皮均被充公，近日亦收到傳票，需於下周三（21日）就其無牌販賣一事上庭。
黎指朱婆婆患有嚴重風濕關節炎、鼻黏膜炎、胃病，「佢（朱）以前每晚鼻黏膜炎都會留半碗鼻血」，其後雖完成手術，卻希望自力更生，不領綜援，「婆婆個人好有骨氣，佢唔想攞綜援，怕無面」，稱朱只因做一蚊生意，或需面臨數千元罰款。
黎批評食環署執法過嚴，「上一代人可能唔知法例，亦無諗到對方可能有惡意，其實婆婆都只係想自食其力，唔受干預，仲要對方年紀咁大、身體又唔好」，認為是次事例是以法例錯殺良民，「食環執法太嚴亦唔靈活，令人覺得社會好涼薄」,稱法律不外乎人情，望最終法官輕判。黎指現階段有義務律師答允幫助朱婆婆，望最終朱婆婆不用在官司中花費分文。
網友回應
乜世界？設個陷阱俾個自力更生既婆婆跌落去、然後去拉佢、告佢，咁無良既事都做得出! 呢組食環既人都好有問題! 其實佢哋明知咁樣賣紙皮係叫''冇牌小販'', 婆婆根本冇主動去賣貨俾佢哋，但係佢哋又用金錢去引誘婆婆賣貨俾佢哋，咁佢哋D食環人員係咪有''誘使他人犯法''之嫌呢? 好有疑問lor! 應該告埋佢哋!
法律不外乎人情！無錯法律上婆婆是犯咗法，但只為小事濫用法律程序，浪費政府資源又如？販賣紙皮是犯法，那旺角先達門外收電話的又是否無牌販賣？食環署執法不公？定濫權起訴？
咁都捉？食環班人係咪要咁無人性？！
睇咗封求情信我都好想喊，個老人家辛勞咗大半世依家仲要擔驚受怕，真係冇陰功囉…