今次真係想打篇文發泄嚇果種心痛到空虛到無曬感覺嘅feel出黎…對唔住可能好負能量……
文長，因為我會將我經歷打曬出黎…
背景：我同女友識咗四年半，佢大我三年。大家都係外國番黎。我係初戀，佢起外國當年拍過拖 (keypoint)
當初大家係同事，咁都係一般人咁行街睇戲食飯慢慢增進感情成為情侶；
其實當初佢接受我果時係有少少保留、佢話佢係一個無乜安全感嘅女仔，我果時覺得係因為我後生過佢，我下定決心為咗佢會成熟 會成為一個有承擔嘅男人 (初戀總是盲目的)
然後, 大家一齊起同公司發展，感情我自問都好穩定；雖然爭執少不免，回想番我地大家都因為彼此改變咗好多臭脾氣
我地當然會做情竇初開嘅情侶會做的事：去旅行。
我地第一次旅行係去泰國，果陣記番真係好傻b，同自已講佢係好女仔 唔好一時咸濕就搞人 所以無預備到dom, 不過我依然訂咗雙人房 (哈哈)
果晚好深刻，情到濃時 無套衝落下面7仔買 你知啦細個去收銀處望到都老尷 果陣唯有硬住頭皮扮經驗老到咁俾錢…
衝番上房 青頭仔好難入啊 咦有血嘅 哇原來黎m 最後搞到成床血 謀殺案咁
(不過都知道咗佢唔係處 我明外國留學係開放d)
番到香港果晚送佢番屋企 都係忍唔住問佢first night嘅對象背景：前男友，日本藉澳洲居民…有自已樓有自已經濟能力…佢屋企都有人入咗藉有曬家室一齊起澳洲生活…
果刻有d唔開心，原來佢ex咁好條件，不過我收埋起心，因為佢人已經番咗黎香港 我有信心拎到佢個心，同佢發展落去。
時間過去，我轉新工佢繼續起舊公司。依四年我地繼續做情侶嘅日常, 又去好多旅行，介紹自已屋企人佢識 有時睇番d相呀wtsapp呀 個心真係甜的。我唔係果種好多花臣嘅人，細水長流先係我性格，好開心我伴侶都無嫌棄我悶。
背景係咪好長呢 哈哈入戲肉啦…
我雖然無佢ex咁叻，不過都叫做有d家底
屋企有私樓 爸爸媽媽退曬休之餘都有樓租收咁啦 佢地好恩愛會成日周圍去旅行
咁有時屋企無人 咁梗係叫佢上黎訓
事原前幾晚佢話對我唔住，係咁喊，又話浪費咗我d時間云云…
我安慰咗佢好耐，佢同我講工作好辛苦 想番澳洲 (15年佢提出過，我挽留咗佢)
我聽到當然好唔捨得，但係明白起澳洲生活係佢一直嘅夢想。果刻我同佢講：你去啦…You chase your dream, I continue my life… (聖人mode)
之後依兩日我嘗試用平常心去看待件事，繼續做番自已，去珍惜大家嘅時光…但係每當我拖住佢望住佢 我發現自已做唔到去唔怪佢。我唔明大家經歷咗咁多野都比唔上佢對澳洲嘅嚮往? 不過真係寶寶心痛但寶寶不說唉
如果看官們未睇春嬌救志明，可跳過：
前晚我地睇完套戲，內心好矛盾，我覺得我地同千嬅fishman好似: 姐弟戀、對感情有不捨 bahbahbah 不過人地有good ending嘻
戲入面有一段春嬌唔小心望到志明電話…繼而發生誤會…估唔到會發生起我身上 (不過劇係誤會 而現實係更殘酷)
到咗沉晚，我早放工過佢，咁去咗買糖水俾佢食等佢番。食完野，我地親蜜咗一次佢就光豬咁訓著咗。我知道佢番工好辛苦 我無特別叫醒佢，唯有幫佢蓋好被，汁好d衫褲。
突然醒起佢咁大頭蝦實唔記得幫電話叉電；係我衰係我仆街，個mon著起我睇到佢有msg, 我諗起春嬌個幕…最後都忍唔住試撞佢pw開黎睇…
第一次我就試自已生日，估唔到一撞就中。果下好sweet的 哈哈
好奇真係會害死貓，禁開wtsapp…竟然發現第一個就係當年佢個日本人ex。
我果刻個心好平靜，亦都無懷疑我女友；我仲覺得佢搵番ex都無可厚非，因為佢起澳洲同我女友相處咗咁長時間 佢要番去生活暫時都要依靠佢
但係我太年輕了，我一路睇曬佢地d對話。
到我睇曬，個心依然好平靜。但係我知道哀莫大於心死 依幾隻字就正正描述緊我。
原來我一直對女友嘅信任同價值觀都係自已一廂情願：佢地一直都有聯絡，wtsapp, skype, webcam…甚至係我地起香港熱戀依幾年…女友有幾次話同屋企人去澳洲玩…原來都係去密會佢ex…(剩係到依度我唔知各位心唔心寒)
而最令我心痛嘅唔係佢地d旅行照、情情塌塌對話或者日本人中間時間親身黎香港搵佢而女友仲幫佢book酒店再同住，抑或
女友介紹日本人俾d閨蜜識……
原來起2015年佢起澳洲時, 呀日本人已經俾咗promise ring女友，而女友都應承咗佢；到2016年佢又再去澳洲，日本人正式求婚，女友再答應。佢地果陣仲一齊去買傢俬去規劃未來嘅生活添！
你以為電影先會發生嘅野正正發生起我身上哈哈。更甚者，由2015年開始佢地已經準備緊marriage visa。到到依家，佢地之間嘅對話係傾緊婚禮點著, 個頭點set, apply visa篇論文點改grammar。
篇文我睇到好心寒，講到佢之間relationship係幾咁bonded，無咗大家唔得，婚禮起18年年尾舉行；真係仲長氣過我依篇文。
去到依度唔知大家心唔心寒呢，一個枕邊人原來四年來一直背住你做咗咁多野；而自已到最後都只係陪襯、係第三者、係一個大傻B。
我唔知可以同邊個講 我唔想屋企人擔心佢地又未番 我唔想同好兄弟傾訴佢地仲覺得我會最早結婚 我知我好長氣但係我得高&連登可以發泄出黎 真係好多謝你地
放低個電話，佢醒咗少少。問我做咩企起到望住佢。我無出聲，上床訓低kiss咗個額頭一下再好緊好緊咁拖實佢隻手同佢一齊訓。
一路訓果時我不斷問自已依幾年係咪正正好似佢咁講我浪費咗時間起佢到? 我答唔到自已，我剩係覺得自已對唔住父母 (打到依度真係眼濕濕)
本人自問唔風流唔mk，唔通古語有云：男人不壞，女人不愛 先係真理?
但係我可以點壞 我發覺自已連壞嘅對象做嘅都俾我壞十萬八千倍 我好空虛。
最諷刺嘅係我地舊公司d男女關係一直係我地嘅共同話題，大家都成日非常不齒同事間亂搞…果陣我仲用勝利者般嘅口吻同女友傾，而佢正正起你講嘅同時做緊同一樣野 咁你話心唔心死