我今年廿八歲，讀完碩士同朋友開左間補習社，屋企環境都算係中產，由細到大屋企管教都好嚴，我第一次拍拖係由屋企人介紹，男方家境唔錯，外國番黎，拍左一年拖，ex就提議一齊搬出去。屋企人好想我嫁比佢，但佢地唔知道我個ex性格好有問題，除左超級大男人之外，身總會有好多異性圍住。直至三年前，我同佢選擇分開，佢搬番屋企住，而我就唔想比屋企人睇死，所以死慳死抵用小小積蓄買左個細單位，繼續自己住。
以前乜都有屋企人同男朋友搞掂，而家真係得番一個人，由裝修到買電器裝寬頻全部野都要自己完成，日頭仲要番工，其實真係好累。尤期是我係電腦白痴，好多電腦啊wifi啊電器啊個類型問題我都完全唔識。身邊又無乜男性朋友，好多時我都只可以上網問人或者自己做資料搜集。
就係咁上網問問下，我識左而家呢個男朋友。當初我係一個出名多毒男既論壇開post問有關wifi既問題，當然好多人都係求其應我，更多既係無聊笑話同粗口，唯獨係佢好認真答曬我所有疑難，仲好有心機幫我分析邊個router適合我。我地交換左whatsapp傾計，差不多傾左一個月佢話出去深水埗陪我買router，開始左第一次見面。
見到佢既第一個反應，覺得佢都真係幾毒！佢三十歲，做緊Engineer，外型十分老實，談吐都自然既，不過話題都係離唔開電子野同打機。買完之後食左個飯，佢就送左我番屋企，雖然無乜火花，但感覺佢為人好可靠好有安全感。
因為屋個wifi唔生性，我地keep住有聯絡，佢教左我好多電腦wifi既知識，仲好堅持要我自己親手整番好。可能大家會覺得佢唔夠貼心，但我就係中意兩個人一齊互相溝通同經歷令大家成長同進步。就係咁，我地開始拍拖，到而家都差不多三年，最近仲計劃緊結婚，但係屋企人就覺得佢太毒，唔係好識得同人social，成日拎我以前男朋友同佢比較，唔想我嫁比佢.......