冇錯TVB又要播外購大陸劇了！5月8號完結嘅《全職沒女》，將會被外購劇《射鵰英雄傳》接檔。
不過原定接檔嘅係《三生三世十里桃花》，再之前係王晶製作嘅《賭城群英會》。王晶哩部戲雲集佘詩曼、馬國明、黃浩然、陳百祥，仲出動埋四哥謝賢。原本萬眾期待結果俾人抽起，已經搞到香港市民同媒體群情洶湧，依家你居然話我聽變成外購劇？
其實TVB好多年前就開始有播外購劇嘅習慣，當年一集大結局搞到萬人空巷嘅《大長今》至今都係外購劇嘅巔峰之作。不過依家嘅外購劇就再都撐唔起個市，都唔知應該怪部劇唔夠好定怪觀眾接受唔到。
《射鵰英雄傳》係大陸嘅網劇，男女主都係新仔，唔好話香港，就算放係大陸都冇人識，唯一就有個型到爆嘅三哥扮黃藥師頂住。不過哩部劇係大陸無論口碑定係點擊率都勁收得，所以先會俾TVB相中。
大量外購劇「水土不服」
睇返近兩年TVB選擇嘅外購劇全部都係睇住大陸邊出劇爆就即刻買落嚟播，除咗武媚娘收視好之外，其他嘅外購劇有時仲慘過《東張西望》。比如張紀中版嘅《西遊記》收視慘澹之餘仲要俾觀眾圍剿要求腰斬。錢就洗咗，但係收視冇之餘仲失曬民心。
挑戰觀眾底線
其實無線為咗救收視真係咩都敢做。早前不停搵老將回巢救市，好似羅嘉良嘅《與諜同謀》、陳松伶嘅《全職沒女》、陳慧珊嘅《波士早晨》（未播）咁，不過都冇辦法力挽狂瀾，於是TVB又繼續行返外購劇哩條道路。不過大部分觀眾對於黃金時段播外購劇好不滿，畢竟依家網絡咁發達，外購劇網上早就有完結版，TVB嘅配音又來來去去都係嗰幾個人，成日聽到「花師奶」把聲都會一秒出戲，觀眾何苦要守住你無線一集一集追呢？
TVB遲早慘變ATV2.0?
依家TVB買外購劇買到停唔到手，本來6點時段就已經播緊《錦繡未央》，遲下加多部《射鵰英雄傳》，外購劇同自製劇就已經平分天下。當年亞視要執之前除咗新聞係自製嘅之外，其餘時段全部都係播外購劇，睇無線依家咁發展，以後會唔會變成第二個亞視啊？
老老實實啦，正gor就覺得無線為咗救市瘋狂播外購劇完全係斬腳趾避沙蟲。想留住觀眾都係要俾啲心機做好嘅自製劇，俾多啲好劇本，培養多啲好演員，咁先係一個電視台自身嘅價值所在。