藝人靠面口搵食，唔少女星為貪靚都曾經接受醫學美容，整得靚固然相得益彰，但唔少醫學美容都存有風險，有女藝人輕微嘅試過甩皮、嚴重嘅試過灼傷，有人甚至搞到面部僵硬，結果貪靚不成仲要受皮肉之苦。
鄭裕玲 頸甩皮
一向對儀容一絲一苟嘅Do姐鄭裕玲，07年出席活動時，被發現頸部大幅度甩皮兼紅咗一大片，由於甩皮情況甚為觸目，即成傳媒焦點。
事後Do姐承認原來正接受為期一個禮拜嘅果酸換膚療程，當時Do姐話：「果酸換膚療程期間唔應該曬太陽同焗桑拿，我忍唔住去咗焗桑拿，我頸部皮膚又特別薄，所以咪搞到咁囉！」
鄺美雲 手灼傷
鄺美雲（Cally）喺2000年接受雷射脫毛治療，當時美容院指「甩焦」後，皮膚就回復光滑，點知Cally手腳傷口一直未好，原來慘遭雷射灼傷，玉臂同大腿被灼爛。
為咗遮疤痕，多年嚟Cally都要著長袖衫褲遮掩，亦因此令接下嘅廣告大受影響。事後Cally一度入稟索償千萬。
陳淑蘭 面僵硬
陳淑蘭（蘭子）14年接受周刊訪問，自爆早年頸部注射肉毒桿菌毒素美容，點知注射完身體不適需要停工。
蘭子話打針後，笑肌位變得僵硬，更可怕系出現口齒不清、吞唔到嘢同呼吸困難等副作用，就連膀胱功能亦受影響，好難忍尿，試過有次透唔到氣，令佢一度有瀕死嘅感覺。
而更慘的還要說說藝人鄭伊娜（Ena），佢因貪靚中伏，前年在美容院扮靚䧟入美容事故，導致雙頰至下巴微絲血管爆裂，之後面部出現顆粒，更有一撻撻紅印，向來膚質甚佳的鄭伊娜，霎時慘變「爛面女」，幾乎毀容。
因為毀容更導致情緒抑鬱恐懼，最後冇收入冇錢交租，山窮水盡靠父母接濟，一年勁啪超過一千粒藥，搞到女性器官機能出現問題，完全崩潰。
Ena形容過去一年半為殭屍生活，重提生活苦況都激動眼濕濕，佢話：「傷咗塊面有疤痕同毀容冇分別，唔好講藝人，普通人皮膚傷咗都唔開心，嗰刻我以為未必可以喺呢行發展。工作、生活都受影響，唔可以見陽光，要戒口，連廚房有光透入屋我都即刻彈開。」
為快復完不斷求醫，人生未睇過咁多醫生，亦冇食過咁多藥，Ena話：「期間食啲藥一定過千粒，食同揸嘅藥膏都好勁，每日只有四小時系有精神，任何人都唔想見，情緒病、抑鬱症、人群恐懼症，試過喺街上見到人好熱鬧，我就喊，依家講起都想喊，件事太漫長。」
2014年嗰時佢同亞視約滿從新開始，同一日就遇上事故，喺新公司傾好節目、廣告全部損失幾百萬元，慶幸無被反告賠償，Ena話：「之後一路冇收入，不斷支出睇醫生，唔好諗身邊啲人會諒解你，有啲人會落井下石，俾說話你聽，成年幾以嚟，我見過朋友一隻手數哂。當時覺得自己好醜，一照鏡會好抆，不斷問自己點解，食咁多藥同揸咁多嘢都唔好，到底邊個真正幫到我。」
情緒病期間，佢曾經素顏參與一個慈善活動，但因帶口罩被工作人員直指影響大合照構圖好肉酸，落台後令Ena哭崩。
及後經家人好友鼓勵，慢慢放下抑鬱情緒，Ena呼籲大家要樂觀正面，依家正式重投工作，Ena話：「主力向國內發展拍電視劇，做內地節目，打開內地巿場，收埋咗咁耐，要追返之前年半條數，雖然爸爸媽媽冇追我數，但我都要俾返佢哋同生活。」
整容需謹慎啊！