《愛・回家之八時入席》隨住毛毛退出，終於都再一次去到尾聲，而緊接會播《財神駕到》，「終於做完愛回家」呢個戲言，諗住真係可以講嘅時候，竟然傳出財神只係懾期，之後2月緊接嘅係《愛・回家之開心速遞》！嘩，又係你呀陳生！
今次仲有傳話係集之前兩班《愛・回家》人物之大成而組合嘅。係，我明白《愛・回家》嘅口碑係幾好，而且長青到好似做咗一世紀（係咪已經超越咗《真情》？）但都唔使無限消費，一方面畀人感覺係無新意，另一方面係所有稍為好少少嘅劇都要做到爛做到悶為止方休呢？就算要翻炒，可唔可以改下個名呢又？不過大台嘅劇，其實就常唔同名，劇情咪又係又以下呢堆，到時2月開插，又睇下大家估唔估得中：
廁所偷聽公司機密
最例牌同出現率相當高嘅劇情之一，就係公司無論小至邊個同邊同拍拖，大至諗住炒人咁，一樣唔客氣會喺廁所入面大講特講，無論高層中層低層一樣照講不誤，仲當然唔會先Check下有無人喺廁格啦。
公司必定出現三角戀
三角戀已經係大台必定會有嘅劇情，至於《愛》劇由於一定有辦公室戲份，所以就必須係由辦公室＋三角戀呢個Combo喇。至於邊個同邊個其實都有得估，兩男爭一女，就其中一位男必定係有錢仔富二代，另一位則係普通人。
全公司上下必定靚仔靚女
喺公司入面，現實好多人話稍為有一、兩位比較養眼嘅男女，已經係萬幸，而喺《愛》劇入面，無論係咩公司，上至高高層、下至普通文員，定必係靚仔靚女，尤其女仔就更明顯。喂，你叫現實上嘅打工仔睇完情何以堪呀？
屋企超級大
繼第一輯《愛》劇入面，馬氏一家經常被人笑幾千萬現金未開頭，甚至有一集講佢哋一家人可以湊到2億！所有處境劇入面主要場口屋企都係超級無敵咁大，仿佛土地問題從來唔會出現，而便所有姑姐叔伯都會一齊住。