上回小編就同大家研究過90年代新五虎嘅下落，真係估唔到佢哋五個人嘅星途會差咁遠。今次就輪到當年以「五美」名義力捧嘅小花，當中有人淡出、有人繼續喺娛樂圈打滾、有人已為人母、有人繼續喺TVB。「五美」包括有傅明憲、曹眾、彭子晴、姚瑩瑩、陳彥行。
傅明憲
父母分別為演員傅奇及石慧。 94年喺英國大學畢業，之後加入TVB。 大家主要focus喺佢嘅感情生活同埋狗狗身上，其實Gigi喺99年結婚前都拍過唔少劇架，包括《命轉乾坤》、《皇家反千組》和《小李飛刀》等等。離婚後生活仍然多姿多采嘅傅明憲，與葉劍波08年離婚後，先後與周立璟和丁子高等傳緋聞，最近情歸年輕佢十年嘅才俊莊家彬，二人目前感情穩定。同時Gigi亦係愛護動物協會會長。
曹眾
曾被喻為六叔邵逸夫愛將嘅曹眾，93年加盟TVB後接拍多部電視劇，07年淡出幕前離開TVB，幾年前低調結婚並誕下一女。除專心相夫教女外，佢現時從事飲食生意，喺12年已經開咗2間食肆。
彭子晴
之前都介紹過彭子晴，最為人熟悉嘅一定係喺《真情》飾演阿靜啦！不過佢喺2001年就過檔去亞視，然後就淡出，據講家陣做緊保險。
姚瑩瑩
姚瑩瑩係唯一一個仲喺TVB嘅五美，當年代表新加坡參加環球小姐而認識袁詠儀，被對方介紹加入TVB。初出道經常飾演弱質女子，作品包括《天地豪情》、《尋秦記》、《妙手仁心》、同埋喺仲播緊嘅《愛。回家》飾演Amanda一角。佢亦喺11年與拍拖八年的圈外男友誕下一子Evan。
陳彥行
一GROUP女仔，總有人行性感嘅。陳彥行（行姐）就係五美之中最經常以水著示人嘅。佢喺06年離開TVB過檔去咗亞視，但3年後又離開亞視。佢拍過咩劇做過咩節目呢？相信大家淨係記得《皆大歡喜》嘅金日，同埋係咁上《獎門人》做嘉賓。行姐家陣係自由身做電台主持。
圖片：微博