乜而家仲有人去拜年㗎咩？難得放幾日假，留喺屋企做自己鍾意做嘅事好過啦！身為高登巴絲，梗係喺屋企上高登、開部PS4打機、再唔係整盒模型砌嚇咁啦！如果通通都唔啱仲可以煲嚇高登神劇，配搭同早餐茶餐常餐一樣咁千變萬化。我哋會同大家介紹最啱用嚟謀殺假期嘅解悶活動，適合選擇困難病患者服用。
先睇嚇有咩game值得玩，都要預時間買架嘛！首先係PS Plus會員一月免費下載嘅《Alienation》，呢隻game玩法夠簡單，就係四個人合作打外星生物。因為唔會射到隊友，寶物亦係各自各，絕對唔會有Team Kill或者鬥搶寶物嘅情況出現；而且本身有番咁上下難度，好多時真係要齊四支槍先夠打，刺激得嚟唔傷和氣，年初三赤口都啱玩。講開PS Plus，其實今個月佢仲有其他好玩嘅免費game，例如《Tales of Zestiria - Digital Edition》，喺新春期間有特別追加。驚玩唔曬不妨照下載，之後慢慢玩都未遲。
想玩大作，今個新年不得不提《Resident Evil 7》。新一集重拾恐怖感覺，啱啲鍾意官能刺激嘅朋友玩。雖然成隻game同上三代好唔同，但據講係咁多集以來恐怖氣氛最強嘅一集，加上PS4版支援PSVR，剛好買咗玩起嚟感覺自然更正！
新年流流唔想嚇親，有隻《Kingdom Hearts HD 2.8 - Final Chapter Prologue》畀你揀。佢係一隻由Square Enix同迪士尼合作推出嘅ARPG，玩起嚟當然冇咁刺激，但喺入面你既可以《FF》系列嘅MK角色，亦可以揀迪士尼嗰幾位傳統卡通人物作戰，見到隻米奇老鼠拎住條大鎖匙去毆人，都咪話唔過癮。加上拎咗以前有故事關連嘅三集做HD重製合輯，內容龐大，打足成個新年假都未必玩得完。
打機唔啱你，又或者唔想成個假期齋打機咁悶，不如買番一兩盒模型砌啦。砌完唔止有成功感，之後仲有實物畀你玩，既然係農曆新年，一於揀兩件紅色模型應節。
如果砌模型技術一般，打算素組又希望靚，RG系列嘅新安洲就啱曬你。RG系列本身就設計得精細又高可動性，更重要係佢本身部件分色整得好仔細，任何一隻RG只要素組、簡單咁劃下線已經唔差。呢隻紅噹噹嘅新安洲不但有鍍金件，主體紅色裝甲噴上光澤紅，砌出嚟就好似上過色咁。雖然因為大隻，價錢比其他RG貴，但砌完之後你會覺得值回票價。
嫌RG太細隻？咁簡單砌唔耐？不如揀呢盒大洋腸渣古MG版Psycho Zaku ver. Ka.。一睇到Ver. Ka.就知佢外型設計有一定保證，成個機體同我哋一般見到嘅渣古好唔同，當大暗藏好多故事入面獨有嘅元素，唔會因為砌過其他渣古覺得悶。另外，佢最大賣點係背脊有大大支能量棒同一大排大砲，淨係呢幾碌嘢都玩你一兩日。如果你打算又打磨又噴油，應該夠玩成個假期。嫌麻煩想只睇不砌，討論區就有巴打砌緊，不妨直接過去睇睇。
MG版Psycho Zaku ver. Ka.
新安洲
唔鍾意打機，又唔想費神砌模型嘅朋友可以選擇煲劇睇片，一樣消磨時間，悠閒地度過新年。
《新福爾摩斯》第四季上星期啱啱播完，按傳統繼續得三集，每集個零鐘，一個下晝煲曬話咁易。第四季三集主題圍繞兩位主角嘅親情線，華生遭逢巨變，事件對福爾摩斯同華生都有好大衝擊，兩個人嘅關係亦漸趨緊張。劇情有意尋求突破，兩人演技依然出色，但坊間反應似乎冇上幾季咁正面，尤其最尾全體出動嘅鏡頭好有TVB膠劇結局feel，追開嘅朋友點都照睇埋佢。如果未睇過嘅，由頭開始煲唔會令你失望，話曬係高登神劇之一。想摷番第1至3季嚟睇其實唔難，上Netflix登記個帳戶就睇到，首個月免費，兼且隨時都cut得。
懶得追番上N季劇情嘅朋友，新系列劇集首推《怪奇物語》，故事涉及恐怖怪物同政府參與嘅邪惡實驗，呢類題材一向極具追看性，加上幾位童星演技出色，形象亦討人歡喜。劇中小孩之間純真友誼、年輕男女嘅叛逆狂傲，以至及父母對兒女深刻感情，令《怪奇物語》比其他解謎冒險作品更具魅力。
不過《怪奇物語》首播至今約有半年時間，可能唔少人經已睇咗，咁可以追另一套Netflix劇《尼蒙利斯連環不幸事件》，劇集1月13日至成套上架，新鮮滾熱辣。同名電影曾經喺2004年上映，由占基利主演。故事講述三個孤兒喺父母死後，阻止遠房親戚兼監護人歐拉夫伯爵向豐厚遺產打主意，佢哋不單要識破歐拉夫嘅詭計同揭穿佢嘅各種掩飾偽裝，仲要調查父母離奇死亡嘅真相。劇集適合小朋友收看，新年一家大細睇最啱。
新福爾摩斯
怪奇物語
尼蒙利斯連環不幸事件
至於各位想按傳統應節，開電視睇第200次《家有囍事》嘅朋友恐怕要失望喇，今年TVB翡翠台凌晨決定重播劇集《一屋老友記》，仲要好多時一晚播足5集。即使年三十晚至初三某幾日翡翠台或J5安排播賀歲片，但早段係播《我愛HK喜上加囍》、《百星酒店》等「極品」，要到兩三點先重播《逃學威龍三之龍過雞年》同《大內密探零零發》。星期六大年初一下晝大台會播《賭城風雲》，大家可以專心拜年/打麻雀/玩魚蝦蟹。
如果你鍾意「無定向」咁睇片，打機直播、賀歲片、cult片、經典電影、日韓綜藝節目乜都啱，咁就可以上直播台睇嚇有乜好嘢，即使套片可能你已經睇過，但睇直播勝在有班人喺chat room陪住你邊吹水邊睇，觀感完全唔同㗎。
一屋老友記晚晚陪住大家，好感動
直播台大把嘢睇