每逢農曆新年，唔駛講行 年宵 市場係指定動作，不過年年都係行維園真係行到悶悶地。其實今年唔少機構都會舉辦特色年宵市場同活動，可能就有一個喺你屋企附近！為大家搜羅今年各大年宵市場同賀年活動資訊，實行齊齊迎雞年、賀新春！
1）中環海濱 摩天輪年宵2.0
今年FEED 將會於2017年1月24至27日喺中環海濱摩天輪舉辦「摩天輪年宵2.0」，場內將會有80幾個攤檔，細分為生活品味區、餐飲美食專區、乾貨區（食品）、酒吧暢飲區同兒童遊樂區。主辦單位更指部份進駐餐廳尚未正式開業，所以大家可以藉住今次年宵搶飲頭啖湯！
此外，現場仲會有醒獅表演、賀年食品煮食示範、雞年幸運紅包大抽獎、現場有獎互動遊戲、工作坊同歌手表演，有得食同買之餘仲有得玩添！
想知道年宵嘅場地地圖，商戶資訊、現場表演同工作坊時間表等，大家可以透過Timable應用程式查閱年宵嘅所有資訊。
日期：2017年1月24日 ‑ 27日
時間：11:00 – 23:00
地點：中環海濱摩天輪
票價：$25（下午6時前購票）、$50（下午6時後購票）
＊市民可於現場購票或於Timable網站購票，每位入場人士（6pm後）仲可參加大抽獎贏取豐富獎品
2）林村新春嘉年華 x 麥田捕手假日市集
每年農曆新年都有好多人專程去大埔林村拋寶牒許願，如果你都正有此打算嘅話記得預留多啲時間！事關今年林村將會於年初一開始舉行「新春嘉年華x 麥田捕手假日市集」，不但設有本地創意市集區，仲有得睇大型花車巡遊匯演同漫花飛舞水晶球添！場內亦設有大型吹氣城同幻彩許願天燈攝影區，啱曬一家大細玩兼影相打卡！詳情按此
日期：2017年1月28日至 2017年2月12日
時間：09:00-18:00
地點：大埔林村許願廣場
3）時代廣場：過年睇粵劇
新年流流好多人都會睇下賀歲片笑番餐，但今年又多咗個選擇！時代廣場將會同八和會館合作，於1月14日開始至2月11日期間，每逢六、日都會變成戲棚上演10場粵劇，每節半小時，場內仲設有照相館俾市民扮花旦或大老倌影相，費用全免！按此了解詳情。
日期：2017年1月14日至2月11日
時間：10:00-22:00
地點：時代廣場露天廣場
4）東港城：第十一屆新春花展會
將軍澳東港城今年將會舉行全港最大嘅室內年宵市場，供大家買年花辦年貨，當中最著數嘅要數只售$8嘅開運年花「運財童子」，限量100株。除咗行年宵外，大家亦可以參觀場內嘅「年年有魚3D藝術展」。今次主辦單位更推出優惠，只要於場內以電子貨幣（包括信用卡、易辦事及八達通）消費滿$2,500而又有買年花，就可以免費電召小型貨車幫你送貨返屋企喇！瀏覽官網了解詳情。
日期：2017年1月14日至27日
時間：11:00 – 21:00
地點：東港城一樓展覽場
新年仲有一樣必做嘅嘢，就係一家齊齊整整咁食團年飯喇！
相關閱讀：【新年攻略2017】新春 團年飯 x信用卡優惠
5）Fairish夜玩香江年宵市集
Market Fairish 係由一群熱愛市集嘅朋友組成嘅組織，提倡復興傳統墟市嘅買賣和文化交流的功能。佢哋今年將會於年廿八至年三十晚，一連三日於荔枝角舉行Fairish夜玩香江年宵市集，一共有近200個攤位。除咗新年擺設、節慶禮盒等賀年貨品外，仲有好多獨立設計品牌、原創手作等貨品發售。
市集仲會開設DIY利是封工作坊同巨型中式日曆Selfie專區，仲有各式各樣嘅攤位遊戲，唔駛怕小朋友會悶親！行過D2 Place One 嗰陣記得攞番張Market Fairish 貼紙，憑貼紙可以喺D2 Place Two免費換領賀年福袋一個。行到咁上下見肚餓，又可以去美食POP-UP SHOP買嘢食醫肚。按此到Market Fairish Facebook專頁了解詳情
日期：2017年1月25日 – 27日
時間：15:00-23:00
地點：荔枝角 D2 PLACE ONE 2樓 The Space 、荔枝角 D2 PLACE TWO 2樓 Event Space
6) 元朗大棠冬季樂園
好消息！今個冬天雖然不太冷，但都唔一定要出國旅遊至感受到零下10度嘅冰天雪地！位於元朗大棠嘅冬季樂園佔地超過24,000平方米，場內設有冰雪館，分成冰雪糖果世界、冰極酒吧、聖誕老人村同雪國列車等六大展區。
園內設有巨型水晶球，好適合大家影相打卡，園內仲有不同攤位遊戲、小型賽車城、極速旋轉溜滑梯同埋有5層樓咁高嘅超級紐約滑梯，一家大細嚟玩絕對唔怕悶親！館內溫度控制在零下10度或更低，大會將免費向參觀者提供3款尺碼嘅雪衣借給參觀者，不過大家最好都準備多啲禦寒衣物，以免冷親！按此瀏覽官網。
日期：由即日起至2017年4月17日
時間：10:00-18:00（星期一至五）；9:00-22:00（星期六、日及公眾假期）
地點：元朗大棠
門票：
– 任玩套票1張 (只限周一至周五入場、公眾假期除外) $180.00
– 超值套票1張 (星期六,日及公眾假期) $180.00
– 普通門票1張 (適用於所有樂園開放日子) $90.00
7）荃灣千色匯：文創主題年宵市場
荃灣千色匯同元朗千色匯今年以賀年花朵為主題，請來多位本地插畫師設計大型賀年花卉插畫布置商場。此外，插畫師更會於1月22日至27日期間於荃灣千色匯擺設攤檔，售賣別具本土設計特色嘅公仔、飾物、Tote bag同名信片等。大家只要於1月15日至2月22日於荃灣千色匯或元朗千色匯以電子貨幣消費滿$800，就可以換領由本地插畫師設計嘅精美禮品，如利是封同彩印陶瓷碗一對。而喺呢段期間更會有商戶購物優惠，想慳多啲就要留意喇！
鍾意D.I.Y嘅朋友可以於1月23日至2月22日參加場內嘅賀年工作坊，譬如荃灣千色匯就有自家賀年風車，俾參加者將自拍照片製作成風車。而元朗千色匯就推出賀年工作坊，市民可以親手製作賀年天燈杯或電話福袋。
另外，聖雅各福群會將於2017年1月31日至2月5日期間喺場地設置「善心磅」，只要捐贈超過380克嘅包裝食品，就可以換領限量福袋乙個。而聖雅各福群會就會將收集所得嘅食品轉贈俾有需要人士。按此了解詳情
日期：2017年1月22日至27日
地點：荃灣千色匯/ 元朗千色匯
8) 恩聯「慶十載。迎新春」親子嘉年華
由一班傷健義工組成嘅恩聯福利會為咗慶祝成立10周年，今年農曆新年將會舉辦親子嘉年華同大家迎新春！大家可以一口氣玩曬We嘩充氣嘉年華最熱門嘅遊戲、電動小賽艇同十幾組應節嘅充氣、機動同多種遊樂設施。按此了解詳情
日期：2017年1月29日至2月5日時間：11:00-18:00
地點：青衣體育會運動場（青衣青綠街38號）
收費：不設入場費，遊戲套票$160（任選$50遊戲4次 及 $10遊戲1次）另設$10, $50遊戲券
9）MOKO新世紀廣場：「豐衣足食迎豐年」年宵
上年旺角MOKO搞年宵大受歡迎，今年一於再接再厲，除咗增加攤檔至13個外，仲有多間商戶推出每日精選年貨。商場每逢星期日（1月8、15及22日）舉行嘅「豐衣足食新春特賣日」同年三十晚（1月27日）舉行嘅「豐衣足食除夕特賣夜」，再加上商戶如日本品牌Vanilla Dew、Vivienne Westwood同Joy & Peace推出低至15折優惠，想掃筍貨就要mark定日子！
大家只要於2017年1月13日至27日期間於商場消費滿$500就可以獲得「繡」蝶戀花利是封乙套（一套8個）。仲有，如果同日以同一銀聯卡簽賬滿指定金額，更可得到高達$250嘅新地商場贈券，所以行MOKO時記得準備定銀聯卡！按此了解詳情
日期：2017年1月6日至1月26日
時間：10:00-22:00（1月25至26日，年廿八-廿九開放至午夜12時)
地點：新世紀廣場MTR樓層中庭
10) 維園年宵
睇咗咁耐都係覺得維園例牌必去？今年維園總共設有超過400個攤位，其中最觸目嘅就係連續4年投得最大攤位嘅ClubONE所推出嘅「肥燶叉燒雞蛋仔」嘞！而謝霆鋒更會同米芝蓮三星大廚梁經倫合作推出特別「鋒．魔．愛心撈」，有鵝肝、雞冠同泡菜等20款材料，收入將捐予公益金。想知今年手宵有咩攤檔？網店平台Boutir將推出維園、旺角年宵電子地圖，利用Google定位功能，幫大家搵出不同攤檔的位置同售賣嘅商品資料，想買心頭好就唔駛搵親懵啦！
提提大家，今年嘅花車巡遊匯演將會於1月28日（年初一）晚上8:00-9:45喺尖沙咀舉行，而農曆新年煙花匯演就會喺年初二舉行，大家密切留意！
日期：2017年1月22日至28日
地址：銅鑼灣天后興發街1號