好多人都喺度等待緊愛情出現，唔知係咪一種確信「係你嘅就係你嘅」心態，定係單純懶惰，
好多人就係「排著隊拿著愛的號碼牌」，然後齋企喺度等。
現實生活無白馬王子，唔會你齋瞓喺個森林度都會有個真愛騎住馬去搵你。
我都相信緣份係冥冥中有安排，不過有時候都需要一啲人為嘅協助。
如果你嘅生活圈子好窄，根本無對象，咁唔通你仲堅信可能有日出街突然撞到個一見鍾情呢～
如果你嘅性格好難服侍，唔通你仲堅持愛我嘅人自然會愛埋我嘅缺點咩？
愛情同中獎一樣無得強求，只係講彩數，但唔代表你咩都做唔到。如果想中獎，你都要出門去買六合彩先得㗎！
如果想拍拖，就要幫自己增加多啲認識對象嘅機會。呢個年代，網上識人，交友app，已經唔係咩丟臉嘅事，喺保護自己嘅情況下，去識多啲對象，why not?
買咗六合彩唔一定中，拍拖都唔包真愛白頭到老，以前讀書讀中化有句說話：「盡人事聽天命。」
意思係指你要聽天命之前，必先盡咗自己可以付出嘅最大努力，盡力之後嘅結果就交給緣份了。
所以等愛唔係真係齋等，就會有日瞓醒出現真愛，想得到愛嘅就要付出，那管係去擴闊一下圈子也好，
主動啲去同異性溝通也好，甚至檢討下自己難相處嘅缺點都好。想要得到一樣嘢，係要付出嘅。