唔知點解兩父子一定係狗咬狗骨, 我身邊好多朋友都係咁，特別係十零廿歲開始 ，無論老豆講乜嘢說話都係聽唔入耳 ，老豆講任何一句說話我地都會駁嘴駁舌 ，激到老豆冒火三丈, 我諗50對父子裏面有49對會發生呢啲咁嘅情況 。隨住大家年紀漸長， 老豆愈來愈萌塞而執著 ，我哋後生亦都有自己一套思想， 所以同老豆之間嘅衝突越來越多 。兩父子之間嘅舌戰一定要以戰勝對方為目標 ，落敗的一方一定會唔睬另一方幾日 ，少數更會刀光劍影刀來刀往演變成流血衝突。 諗番諗返起細個嘅時候兩父子關係及十分之好， 一齊踢波 ，行山行公園 ，去街去玩好溫馨好溫暖。
然而我哋後生一輩認為隨著年紀越大越感受唔到父愛。 同樣道理 ,父親年紀漸老亦都覺得父子之間感情越來越淡 。但事實上其實我哋做仔嘅內心深處其實好關心老豆 ，只不過隨住我哋年紀漸長越來越成熟， 一個成熟嘅男人唔會好似以前做細路仔嗰時咁樣嗲老豆向老豆撒嬌 ，亦都唔會好似細路仔嗰陣時咁溫柔地去溝通， 可能呢D就係男人嘅尊嚴吧! 有時我哋語氣比較重 ，見到老豆唔食藥唔肯睇醫生唔戒口 ，我哋好勞氣咁鬧佢 ，但其實我哋只不過係好錫佢好緊張佢。
諗返起阿爸患重病嘅時候 ，我每一日都唔怕辛苦到醫院探佢 ，煮嘢畀佢食 煲湯畀佢飲 ，佢病情到最嚴重嘅時候 見到佢咁辛苦 ，我會偷偷地咁喊， 甚至乎喺床邊我摸住佢隻手眼淚不停咁流下， 期望佢快啲好返 ，我諗我超過25年未試過捉住老豆隻手 ，嗰一刻溫暖嘅感覺返番嚟 ，但都後悔點解唔可以早啲捉住佢隻手， 點解人要到生離死別嘅時候先會珍惜一切?
好慶幸地阿爸從鬼門關返番嚟， 佢好返喺屋企休養嘅時候， 我哋兩父子感情好好 ，我亦都對佢好溫柔大家客客氣氣， 我亦都感受到佢嘅父愛， 但隨住時間沖淡 ，我哋亦都再次互相頂頸 吵吵鬧鬧 ，不斷鬥嘴舌戰 ，係都要戰勝對方 ，故態復明 。但無論點都好 我哋依然係兩父子， 我哋其實都好愛對方!