曾華倩的兒子林浩賢昨日於港九區學界D1游泳決賽中，勇奪50米自由式冠軍，同時刷新兩項香港學界紀錄。Martin致謝辭時，多謝媽咪一直以來的付出，並每日凌晨不辭勞苦載他練水；她又直言今次勝出，為中學生涯畫上完美句號。
華倩接受訪問時坦言很開心，問到會否跟兒子吃飯慶祝時，她謂：「佢大個嘞！都出咗去同啲同學仔慶祝。」華倩指這兩年兒子參與了多個比賽，而這位廿四孝媽媽更每次都於現場陪伴，與兒子齊齊「出賽 」。華倩說：「真係飛到頭都暈，之前去咗好多地方，泰國、馬來西亞同印尼。上年去印尼學界比賽，嗰次100米自由式嘅成績都好好，現場仲有升區旗，我真係覺得好感動。通常佢去外地比賽，我都會參與。」
讚兒子超水準
華倩亦開心表示在剛剛過去的九月，兒子去了廣州多個地方作學界比賽，更攞了兩個金牌，成績斐然。談到昨日的比賽，華倩坦言起初都怕兒子之前出賽太多，體力透支：「唔expect佢好好，盡量啦！不過佢今日（尋日）嘅表現比我想像中係超水準，今年係佢中學最後一年，總算完美畫上句號。」
華倩又透露，兒子快要面對DSE考試，故稍後都要「停水」，放多些時間於學業上，她謂：「月中佢要去日本比賽，因為有個錦標賽，之後就真係要停水，冇辦法，個個都係咁，不過我覺得個仔完全唔落水就唔會，有時間嘅話都會去游水放鬆嚇！」
後生仔唔怕辛苦
談到兒子操水多年，華倩坦言囝囝很享受當中的過程，更不怕辛苦，她謂：「只要係鍾意，係唔會覺辛苦嘅，一班隊友一齊練水係好開心嘅。（成日咁操法做阿媽唔肉赤？）後生仔係應該鍛煉嚇嘅，不過阿媽就一把年紀，辛苦啲，佢哋後生仔一個回魂覺就返番嚟！作為媽媽嘅我一定會支持。」
現年51歲嘅曾華倩，離婚近14年一直保持單身，期間只跟過無綫小生馬國明傳緋聞，不過戀聞最終不了了之。而1983年入讀無綫藝員訓練班的華倩，憑藉甜美外表很快便備受無綫力捧成為當家花旦，輾轉至今33年。而值得一提的是，在這33年間，華倩的樣子依然十年如一日，即使年屆半百亦十分省鏡，好似唔識老一樣！
當年曾華倩（右）同藝員訓練班同期同學吳君如（左）及劉嘉玲情同姊妹！
劉青雲都係佢同學嚟㗎！
今年51歲嘅曾華倩於1983年考入第12期無綫電視藝員訓練班，同期同學仲有吳君如、劉嘉玲同劉青雲等等。曾華倩畢業之後隨即加入無綫，獲安排主持兒童節目《430太空梭》，而備受力捧嘅佢拍下多套劇集如：《楊家將》、《倚天屠龍記》及《新紮師兄續集》等，當時仲成為無綫當家花旦！
不過，曾華倩喺感情道路上並不順利，大家最熟悉嘅一定係佢同梁朝偉嘅一段情，佢哋兩個一拍就拍咗6年拖，不過就三度離合未能開花結果。
之後佢又同藝人陳庭威拍拖3年，但又分手收場。
最終曾華倩喺1996年與商人林肇基結婚，仲喺1999年誕下兒子林浩賢，但二人喺2002年離婚收場。
成為單親媽媽嘅曾華倩，獨力照顧兒子，事事親力親為。
直至2005年曾華倩因為同年輕9年嘅無綫筍盤馬國明（馬明）喺咖啡店內被拍得親暱談天，兼揸車車馬國明到其寓所過夜，所以傳出緋聞，但亦有傳因曾華倩兒子反對戀情，令呢段姊弟戀不了了之！