古語有云「家醜不出外傳」，但對於現代人黎講，隨著網絡嘅發達，大家越黎越鐘意、亦都越黎越習慣將自己生活上嘅一切，無論喜與悲，感恩或憤怒嘅事都直接放上網同所有朋友，甚至所有人開心 Share。
ICQ嘅年代，因為空間有限，大家可能只會係ICQ Info用幾句歌詞代表我的心，到左Showhappy.net、Xange等等網絡日記開始興起，相信大家都遇過一D會將自己生活事情巨細無遺網上見嘅朋友，當時身邊亦有朋友因為唔鐘意另一半將大家嘅所有經歷都寫上網而鬧交，因為覺得好似無哂隱私咁。
但去到 Facebook 已經變成大家日常生活一部份嘅今日，將個人隱私放上網已經成為常態。有人會邊生仔邊Update Facebook status，亦見過有人係臨死嘅親人隔離自拍放上網，好少人係上網曬恩愛、曬BB、曬寵物、抱怨生活、表達政見時，會考慮關於個人隱私嘅問題。基本上就算你同某個小學同學二十年無見，但你都可以透過Facebook見證佢由失戀到結婚，由生BB到小朋友一歲生日會，你地可能二十年黎都無再講過一句說話，但一個Facebook點讚，就令彼此仿佛真係仲係對方身邊其中一位朋友一樣。
係網上公開自己嘅隱私係自由，但如果你發表嘅言論、照片、影像等等涉及到另一個人嘅時候，其實又係咪要諗下對方感受呢？
以個人經歷為例，身邊其實有唔少Facebook朋友會好係吳若希咁，一言不合就將個人情感問題放上網，直接將對方做左D咩，令到自己有幾嬲有傷心等等全部寫上Status。呢種做法好明顯係為左宣洩個人情感，我好嬲好傷心好想有人安慰認同支持關心我，所以我有權係自己Facebook寫底自己嘅感受。至於朋友係留言安慰我話Don』t be sad baby, We will always be with you 嘅同時，會唔會有人鬧我嘅另一半、另一半在唔在意兩個人嘅感情事被放上網公審呢D我全部唔理。
或者吳若希嘅另一半唔在意呢種做法，畢竟佢亦曾經係Facebook寫過只當前女友係雞，事事網上見可能對於某D情侶黎講係屬於佢地獨有嘅相處模式，但呢種做法未必適用於所有人。
曾經身邊有朋友懷疑自己另一半出軌，佢打電話搵唔到對方，所以好嬲將所有嘅懷疑、憤怒、不滿全部寫哂上網 Tag 對方，二人嘅某位共同朋友甚至因為睇唔過眼，走左去男方嘅Facebook留言鬧佢，雖然最後發現只係一場誤會，但兩個人只能分手收場，因為彼此有太多共同朋友，男方無辦法接受二人嘅感情好似笑話咁放上網被人隨意批判。
老土講句，現今嘅生活的確離不開網絡，我地習慣甚至開始需要呢種黎自網絡分享而得到嘅關注，有人會將你願意係網上幾公開我，放唔放二人合照等等成為驗證對方有幾愛自己嘅標準，兩個人遇到感情問題時亦習慣會將一切寫上網，但無論對方有冇做錯，有幾錯都好，如果你依然想繼續同呢個人一齊，想去解決同處理兩個人之間的問題，係用Status去寫文發泄之前真係要考慮下「網絡公審」呢種做法其實係咪會對對方做成傷害，最後自己又承唔承受到兩個人嘅感情事成為身邊其實完全唔熟嘅Facebook朋友茶餘飯後嘅八掛。
上網發泄好易，打幾隻字就得，但所有嘅文字或影像一旦上網基本上就係一條不歸路，你可以Delete 自己個Status，但永遠無法清除人地留係自己電腦、手機嘅Cap圖。下次幾嬲都好，打Status時停一停、諗一諗，網絡世界真係一個但凡upload 就必留下痕跡嘅存在，或者你會有不一樣嘅處理方法。
純粹思考題：今時今日上網曬小朋友相嘅父母，老左之後又接唔接受到仔女可以一鬧交唔爽你就係Facebook Tag 你仲要 set public 發泄呢？