TVB早前重播嘅百集長劇《創世紀》，主角卡士固然有份量，配角方面亦位位戲味十足。
要數全劇最具人氣嘅角色，除咗葉榮添同許文彪之外，肯定非呢位霸氣十足嘅霍景良（郭峰）。
郭峰飾演嘅霍景良，據說角色嘅名稱由來，源於當時有位幕後好乞人憎嘅梁姓高層，因而將角色命名為「Fxcking Leung」。
是否真有其事不得而知，但霍景良嘅人物性格，確實寫得立體鮮明，縱然行徑卑劣，但就系徹頭徹尾嘅「真小人」。
或者就系因為咁，霍景良講嘢總系聲大大，再配以其招牌笑聲，加上句句有骨兼且極具霸氣嘅對白，娛樂性十足。
綜觀《創世紀I、II》，霍景良金句眾多，編劇們度對白固然有功，但假如無郭峰猶如「上身」般嘅演繹，肯定令劇情失色不少。
【霍景良霸氣金句】
你話嚟舔我鞋底，要求我幫忙，都叫做啱聽啲！同我攞對拖鞋嚟！
細路，朋友系互相利用架咋，佢今日走咗，可能大家暫時無咗利用價值，佢喺外面另外有新世界，當你發覺佢有再用得著開地方，大家又朋友架喇！
我霍景良要睇邊個，踩邊個，睇心情架咋！
太陽落山飲茶？飲酒慶祝嘛！
玩大富翁之嘛，計好自己有幾多本錢，攤開幾個party出街掃貨，香港炒啲，英國炒啲，六個禮拜後，見高就放。你哋力天公司，坐個人埋嚟，多雙筷子，無蝕底架。
唔好同我婆婆媽媽，你哋賺錢賺得應分，我使錢使得高興，千祈唔好比個game停，我最無耐性窒住道氣做人，話曬香港地都系借返嚟嘅地方，Easy Come Easy Go。所以千祈唔好同自己啲時間客氣，See？
依家我順便同你減埋磅，啲鮑魚一隻都無預你份。
我做得到系因為我叻，唔系代表你哋都得，比心機啲啦！
態度正確，我都一樣。
每個月賺個一萬幾千，死慳死抵玩股票，妄想一朝發達，佢哋根本就唔知道，真正嘅大贏家系邊個。
我頂你個肺呀，你依家玩我呀？
個市日日咁升，晚晚咁慶祝，你有無覺得攰呀？
估唔到同場加映動物生態紀錄片，狗咬狗骨。
你坐咩啫，我唔識字要你講咩？
幾好聽，如果呢個世界上，我要搵一個人做我契弟，最有可能亦都系你。哈哈哈！
我無需要向其他人交代，有證據就拉我，無嘅就收聲，聖誕快樂！
架車喺對面？我人系度呀！叫我就架車？