去旅行真係最可以睇清一個人既人品
冇今年4月同一個前同事既日本旅行，都冇諗過人係可以cheap成咁的
以下開心些牙下D旅行經典事件。
第一樣最經典既:300yen雪糕，覺得唔抵食，要求退錢
有一日係便利店，佢睇中左杯好大既阿菠羅雪糕，見到價錢牌寫住200yen，覺得好平喎，就即刻拎去俾錢。
點知俾完錢先發現，收銀收左佢300yen。
佢唔識日文，咁唯有我同個店員溝通睇下發生咩事。
原來個雪櫃果格本身有兩種雪糕既價錢牌，但因為200yen果隻賣哂，300yen果隻又多貨，咁就睇錯隔離啦。
咁既然都買左，我諗住佢會算啦，點知佢係咁chur住我，話要個售貨員退錢俾佢，佢唔要杯雪糕，覺得杯雪糕好唔抵。
我話：但日本唔興咁樣架喎…俾左錢就係要架啦，退番好冇禮貌喎…
佢：嚇？咁架咩？但我真係覺得唔抵，總之你幫我退左佢！
佢唔識日文，就要我呢個半桶水識日文既人做衰人，俾佢磨到個店員退錢俾佢。
佢之後仲要煞有介事咁講：原來日本呢邊咁架，我下次會小心睇清楚價錢先買架啦，盡量唔會有下次！不過如果真係又發生，我都係會要求退錢。
就算係香港，比如話我係超級市場睇價錢覺得OK執左袋橙，點知收我錢既時候個價貴左，我都會即刻同個店員講唔要，因為我覺得唔抵既野我就唔會要！
我除左好無奈咁望住佢之外唔知講咩好。
-繼雪糕事件之後佢有做另一件更失禮既野
果陣去日本買野，都仲係有分消耗品滿5000免稅，一般品滿10000yen免稅，兩樣係分開計。
咁我地去TOKYO HANDS買左一堆野[主要係我買左一堆野]
俾完錢既時候，出面免稅櫃檯個職員同我地講上面個免稅規則，
咁果時我地得一般品8500幾，消耗品4000幾，咁要再各樣買多少少先夠。
咁我同佢講話，大家一齊諗下再買D咩啦
我話消耗品同一般品我都可以再買多少少
咁佢見D 100yen筆咁平，就諗住執多5-8枝筆湊數
我果陣都好努力咁仲睇下有咩買去令佢買少幾枝筆
到終於湊好去俾錢既時候，佢先話：其實我仲咩要買咁多枝筆，我岩岩有件野想買，不過覺得佢貴冇買，900yen，咁買一件就夠哂啦。
跟住佢用中文同個收銀講：D野我唔要啦
就沖走左
留低我係後面同個收銀勁愕然咁望住佢跑走
個收銀問我呢D野要唔要
我好唔好意思咁同佢講果個人D野唔要
收銀又問我，咁我個籃果堆係咪都唔要
我話我要 [咁我果D新買既都係湊數既一部份]
真係好羞家，我完全唔想講我識佢
跟住整完一大輪，佢買左900yen件野，去到免稅櫃檯
退完稅之後，俾番佢既有200yen左右
佢即刻發脾氣：退得咁少，我仲咩要買多咁多野(好多喎)黎退稅！早知唔買啦！
我心諗，即刻我幫你湊就得，你幫我湊就唔得啦
佢果晚仲要係咁係度話：呢日係我最黑仔既一日，搞咁多野退得果咁丁少稅，BAD DAY！以後唔黎呢間TOKYO HANDS買野！搵笨！
我無言咁無答佢任何野。