樓價只升不跌，要買樓，喺香港已經成為一個「夢想」，試問有幾多人可以無父幹之下，成功「上車」？
難怪今日新聞報道，房委會公屋申請者統計調查，30歲以下嘅申請者，有多達71%係有大專或以上學歷，而當中嘅4成係認為
「年紀尚輕而低入收時申請」絕對有利無害，買定保險，日後啲樓點升都好，都可以有樓住。
以前大家有幾可會諗到，大學生畢業後，都係住公屋吖；其實香港新樓供應絕對唔少，只不過係太貴，目標買家係炒家同大陸人，
所以香港大學生依舊無希望買到啫。其實唔好睇小公屋呀，過往喺網上已經係唔少人分析過，住公屋先係王道，
阿媽聽到個女嘅男朋友住公屋，隨時有雞脾食呀！
無供樓負擔
年輕人為求上車，好多時死慳死抵，5年睇得兩次戲，幾年都唔去一次旅行；仲要儲到首期上車只不過係惡夢嘅開始，以後每個月供樓唔見一大截，又要擔心份工又要擔心前景；不過如果住公屋就唔同，每月交租非常輕鬆，大把錢剩去旅行又得，儲錢又得，倆口子無負擔可以追求夢想！
進可供退可守
好多年輕人申請公屋，甚至凶宅都唔介意，其實因為貪公屋進可攻退可守，其實好多年輕人申請到單人單位之後，都唔會點住，純粹用嚟準備將來可以用綠表買居屋，唔使補地價平一大截；
加上宜家嘅私樓又縮水又愈嚟愈細，居屋反而實用面積大，仲平成2、3成，綠表絕對係王牌。
無後顧之憂
辛辛苦苦儲錢上車買私樓，不過大家唔好忘記，經濟周期係會變，咪咁傻豬聽地產商講以為後樓市永遠都咁好，邊有投資係只升不跌？
尤其宜家樓市已經去到畸形上升嘅地步，坦白講無人話得埋樓市泡沫幾時爆煲，住私樓隨時變負資產。
住公屋呢？樓市升咪繼續住公屋，反而愈爆煲愈開心，儲定錢執平貨呀！
政府樓政府搞
住私樓，間屋有咩問題都要自己搵人整，樣樣都係錢，一唔覺意又到強制維修迫住夾錢，仲有宜家咁多圍標，畀錢都心不甘情不願，真係賺埋唔夠畀；租公屋就爽喇，差餉管理費都唔使畀，有事就叫房署幫手整，每年又有優惠幾個月免租是常識吧。君不見幾多公屋富戶有幾層私樓都照霸住，你就知公屋先係爽啦。