TVB喺12月將會舉行《萬千星輝頒獎典禮》，到底今年邊個可以贏到視帝視後嘅寶座呢？
今年TVB都有好多部精彩又好睇嘅劇集，口碑好高收視。對於揀邊個做視帝視後，真系唔容易。
佢哋個個有演技有人氣，本來陳展鵬系今年視帝大熱，不過突然殺出《致命復活》嘅郭晉安，真系唔到最後都唔知邊個贏。
視後方面，胡定欣嘅機會好大，不過田蕊妮都有兩劇揸手喎……總之好難揀就系啦！
【視帝】
歐陽震華
作為收視福將嘅Bobby，今年唯一一套有份演出嘅《一屋老友記》收視高企，Bobby嘅搞笑功力亦深受觀眾愛戴，唔知有無機會爭到視帝呢？
陳展鵬
陳展鵬嘅《城寨英雄》成為今年超hit爆嘅劇集，打得又睇得嘅展鵬，上年憑《張保仔》拎咗「我最喜愛電視男角色」嘅展鵬，今年更加系視帝嘅大熱人選。
王浩信
憑《EU超時任務》渠頭一角跑出嘅王浩信，被觀眾大讚為角色花咗唔少心機，仲要將角色演得有血有肉，系時候頒個視帝俾佢咁話。
黃宗澤
黃宗澤喺《幕後玩家》入面演衰老公，搞到正印龔嘉欣喊爆，成功令各位大婆嬲爆，唔知咁大話題可唔可以令Bosco搶走視帝寶座呢？
郭晉安
拎過「三屆視帝」嘅安仔，喺台慶劇《致命復活》飾演被人陷害而留落荒島嘅角色，演出前為配合劇情不惜減廿八磅，此舉會唔會令佢成功晉升「四屆視帝」呢？
廖啟智
智叔系公認實力演技派，今年終於首次擔正TVB劇《律政強人》，做令人咬牙切齒嘅KC Lau，奸到出汗嘅智叔，就算最後無視帝獎座，相信佢已經成為觀眾心中嘅視帝。
【視後】
胡定欣
TVB花旦之中，今年以胡定欣就最多產。由年頭嘅《公公出宮》去到近期爆hit嘅《城寨英雄》，套套都系大熱作品，相信定欣系眾多女主角之中大熱奪視後人選。
萬綺雯
46歲依然索到爆嘅萬綺雯，最近喺《致命復活》演郭晉安老婆成功彈起，有觀眾大讚蚊蚊嘅內心戲做得好好，希望捧到佢成為TVB視後。
朱千雪
憑《EU超時任務》Madam一角跑出嘅朱千雪，同王浩信夾都無咁夾，加上千雪BB仲有唔少觀眾緣，覺得佢攞系實至名歸。
田蕊妮
田蕊妮今年兩套作品《巨輪2》同《來自喵喵星的你》雖然被劇中其他要角搶咗唔少戲，但話曬阿田都拎過視後寶座，實力已獲觀眾肯定，所以再拎視後都唔意外。
謝安琪
首次幫TVB拍《殭》嘅謝安琪現時專心陀B，雖然Kay應該唔會出嚟同班花旦爭視後，不過當時都唔少粉絲贊Kay外表夠索，話唔定Kay能夠憑靚樣成為民選視後呢！
黃翠如
《幕後玩家》表面好似系男人戲為主，估唔到班女角先惹起觀眾熱話，除咗大婆龔嘉欣同小三劉佩玥彈出，身為女主角嘅翠如BB亦準備搶戲，有機憑劇跑出拎視後。