【填寫圖來源】一眾TVB女藝人轉移戰場，昨天齊齊去到《TVB馬來西亞星光薈萃頒獎典禮2016》上爭艷鬥麗！要稱得上最性感嘅就梗系蔡思貝啦！佢著上一條粉紫色長裙，顏色已經好搶，加埋個就嚟跌到去肚臍咁滯嘅大Deep V，成功谷出八字波！
除咗蔡思貝、當然唔少得唐詩詠，仲有胡定欣及劉佩玥（Moon）！詩詠著上低胸黑色連身裙嘅佢（都系Deep V呀），雖然冇見到事業線，不過都算系性感！而定欣就轉行型格路線，著上一套鮮粉紅色Deep V西裝，就咁睇好似真空，非常搶眼！
在剛剛結束的頒獎現場上，因為頒獎嘉賓惠英紅一句「呢個獎應該叫胡定欣上嚟頒」咯，令到今年《TVB馬來西亞星光薈萃頒獎典禮2016》嘅視帝得獎者呼之欲出，冇錯！佢就系陳展鵬喇！
上年已經攞視帝嘅佢，一上台就大講對唔住：「上年唔可以親口講多謝，今年終於度到期，我多謝所有馬來西亞嘅觀眾。我兩個婆婆都喺呢度出世，所以攞呢個獎系我嘅心愿，今年可以再攞，我好驚喜，多謝經理人樂小姐，同埋多謝伯樂曾勵珍。另外仲要多謝一個人，無論我受幾多挫折，我返到屋企後幾咁唔想返工，佢都一定喺我身邊，多謝媽咪！我呢世還唔到畀你，我諗要留番下一世。」
而上年喺《TVB馬來西亞星光薈萃頒獎典禮2016》同田蕊妮「瓜分」「最喜愛TVB女主角嘅胡定欣，今次終於可以「獨食」唔使同人分，成為出爐馬來西亞視後喇！
定欣喺台下獲悉得獎時，表現頗為冷靜，並與旁邊嘅陳展鵬攬攬後上台！定欣從夏雨接過獎項後定一定神，有少少眼濕濕同硬咽，多謝馬來西亞嘅粉絲：「今日我系好辛苦儲番嚟，好多回憶返曬嚟。我好多謝同事由2001年（其實應該系2011年），短短呢五年間將我帶到嚟馬來西亞，每一年我都可以出席呢個頒獎典禮，由新人、女配角同上年半隻腳踏住，拎咗半個女主。我當時同粉絲講，我一年後要憑自己能力再踏上呢個舞台，好多謝大家咁鍾意刁蘭呢個角色，好多謝牙佬（袁偉豪）、拳佬（陳展鵬）、伍允龍同我健身教練！」
今年，「最喜愛TVB螢幕情侶」獎，最終《城寨英雄》的陳展鵬、胡定欣，以及《EU超時任務》的王浩信、朱千雪齊齊攞獎！大會安排「心形鏡頭」影著兩Pair人咀嘴，但他們扭扭擰擰、你推我讓相當怕丑，最終展鵬及浩信兩男扮咀打圓場了事。
他們在台上分享得獎感言時，千雪表示很Surprise，亦很高興《EU》首次獲情侶獎，浩信更以劇中的「圍頭話」多謝觀眾、TVB及監製。定欣則表示很高興觀眾睇劇睇得投入，展鵬則以馬拉話向現場的馬來西亞觀眾致謝。
不過，之後喺台上嘅司儀鄭裕玲（都都）同陸永直言佢的作狀唔收貨，仲話下一Pair要真咀，知道呢個時候「心形鏡頭」竟然影住都都同陸永，佢兩人只好好無奈咁愈哄愈埋，之後當然冇咀到然後急急彈開啦，都都更鬧爆陸永：「你好似真系想咀埋嚟咁喎！」陸永當然又話番都都啦，真系相當搞笑。
在這次《TVB馬來西亞星光薈萃頒獎典禮2016》上，出道16年嘅張頴康勇奪飛躍進步男藝人獎。當宣布佢攞獎時，全場同佢自己都勁激動。一上到台，張頴康啲眼淚已經琅琅下，然後佢勁激動咁講下以下嘅說話：「16年喇！我咁多年都有得睇冇得去頒獎禮，今年系第一年嚟！多謝無綫高層同馬國嘅觀眾。」
跟住張頴康就開始講故仔：「我有一個故事要講畀大家聽，我六年前，我想成家立室，但系冇錢，所以放棄做演員，去咗做文員，當時要內地、香港兩邊走。點知有一日發生車禍，我諗呢十年嚟我連主角、甚至配角都未做過，好唔甘心！於是我返屋企同老婆講，我要返無綫！老婆講咗句，發你嘅夢啦，屋企我頂，錢嘅野唔使理！多謝老婆，永遠愛你。」由於張頴康嘅說話實在太感人，佢致辭嘅說話，《一屋》嘅演員呂慧儀同滕麗名都有喊！
今年憑《城寨英雄》上位嘅劉佩玥（Moon），終於獲得「飛躍進步女藝員」獎！阿Moon一上台已經喊緊，佢笑言受新鮮出爐「飛躍進步男藝員」張頴康感染，已經開咗「水喉」！只不過，正當阿Moon多謝緊公司畀機會，畀大家認識唔同嘅佢嘅時候，竟然陰公豬被Cue要去廣告，搞到阿Moon勁急一輪嘴多謝家人同粉絲，真系慘慘！
喺無綫有唔少代表作嘅滕麗名，今年憑住《一屋老友記》再度爆紅，最終更加在啱啱結束嘅《TVB馬來西亞星光薈萃頒獎典禮2016》勇奪女配角獎。當宣布阿滕攞獎後，同劇嘅呂慧儀大表興奮。
佢喺台上面一發表得獎感受即爆喊，仲話：「我2004年第一次上台，（估唔到）相隔12年再上台，仲要攞咗兩個獎。好多謝爹地、媽咪包容我呢個失蹤人口，同埋老公嘅包容，要佢做我心理輔導。我一路覺得努力做嘢，唔會在乎有冇獎，但原來攞獎（嘅感覺）咁澎湃嘅！多謝大家陪我成長！多謝！」阿滕講完之後，呂慧儀及劉佩玥等即在台下歡呼，場面感人！
而最佳男配角獎由《火線下的江湖大佬》的楊明奪得，他上台攞獎時表示：「真系諗唔到，我要多謝一個人，今年要鄭重咁多謝佢，人哋唔信我會專心做戲嘅時候，佢畀咗機會我，冇呢個人我冇機會攞呢個獎，我要多謝珍姐（曾勵珍），佢永遠系我最尊敬嘅人。」跟著楊明又多謝家人，最後當然多謝女友莊思明啦！
今年 《TVB馬來西亞星光薈萃頒獎典禮2016》中，「最喜歡TVB電視角色」則分別由多位藝人奪得。
《律政強人》李佳芯&黃智雯
《來自喵喵星的你》田蕊妮
《殭》陳凱琳
《一屋老友記》歐陽震華&呂慧儀&滕麗名
《城寨英雄》陳展鵬&袁偉豪&伍允龍
《城寨英雄》胡定欣&王君馨
《鐵馬戰車》唐詩詠
《純熟意外》蔡思貝