最近TVB台慶新劇《致命復活》睇到唔少人都好肉緊。
皆因飾演韋逸升嘅郭晉安逃出生天之後，發現原來自己系俾人設局陷害，於是決定親自搵出幕後黑手。
不過佢查找真相嘅過程唔單止遇到各種阻撓，而作為旁觀者嘅觀眾，其實更可以發現佢嘅身邊人，幾乎個個都有好大嫌疑。
咁你心目中，又覺得邊個系真正嘅主謀呢？
阮喬（萬綺雯飾）
飾演郭晉安老婆嘅萬綺雯，劇集開頭有「綁架郭晉安呃保險金」嘅嫌疑，甚至有人懷疑佢同黃德斌夾計謀害親夫。
不過呢幾集萬綺雯對郭晉安甚為關心，早前劇情更提及佢為咗搵老公而欠落一身債，咁樣諗落又似乎唔似幕後黑手？
但如果佢真系謀害親夫，咁就真系好衰喎！
林浩仁（黃德斌飾）
出心出力幫郭晉安手搵真相，但黃德斌喺劇中嘅表現亦時有可疑之處。
佢會唔會係為咗萬綺雯所以設局害郭晉安？落力幫郭晉安手又系咪演戲？相信唔少觀眾都有過疑問。
但如果要害郭晉安，但又為救郭晉安搞到俾人射斷腳，好似又得不償失。
你覺得會唔會成個局，都係為咗佢搶人老婆呢？
韋逸隆（古明華飾）
作為老婆奴嘅古明華身為郭晉安嘅大佬，好似好懦弱咁，但其實佢都有不可告人嘅一面。
而第一集提到郭晉安無借錢資助佢做生意開拓大陸市場，亦似乎系埋下咗「害郭晉安呃保險金」嘅動機同伏線。
所謂「最親嘅人都可能害你」，幕後黑手會唔會就系佢？
問題嚟了，有時越唔起眼嘅人越有可能系兇手？
關士傑（張國強飾）
表面善良嘅張國強雖然扮到成個好兄弟咁款，但郭晉安一俾人綁架，佢就即刻攤薄曬郭晉安股份，仲乘機吞併公司。
張國強咁工於心計，如果佢真系最終Boss，都唔系無可能喎～
就算系做緊好人咁樣，但唔知點解，總有種奸嘅味道……