近年人氣急升的 07年港男冠軍袁偉豪，公開承諾兩年內娶港姐女友岑杏賢。言猶在耳，週日（ 20日）卻突然被岑杏賢叮走，她更直指在這段關係中缺乏信任和安全感。本刊直擊二人分手前一夜（ 19日），當時已貌合神離隔開坐。
原來分手導火線是袁偉豪跟龔嘉欣和樂瞳糾纏不清的關係，兩姊妹更因他而決裂。
隔開坐
見唐詩詠後到冇位，心死的岑杏賢唔肯坐埋袁偉豪身邊讓座，寧要唐詩詠加櫈，袁偉豪好尷尬。
唔領情
袁偉豪輕拍女友，示意坐番埋一齊，但岑杏賢唔領情，縮開拒絕。
欠信任死心自白
拍拖三年多，不時傳出婚訊，但岑杏賢週日（ 20日）卻在 Instagram公開飛袁偉豪：「一段感情裡面最重要係信任同安全感。如果這些東西已經不再存在的話，真的不懂怎樣去維繫。今天作出了一個決定，雖然這個結局不是最理想，但還是要面對。」並取消了在 Instagram上對他的關注。
袁偉豪亦在微博承認分手，留言話：「在本年我們的關係再次受到考驗。數月來多次的離合讓雙方承受一定程度的痛苦，加上我一直未能增加她對我的信任和期望。所以今天我們決定要分開了！」
袁偉豪對女唔落閘，同龔嘉欣互 flirt，又與黃智雯拍劇一樽水兩份飲。
袁偉豪同龔嘉欣 13年拍《師父•明白了》暗撻，之後男方同岑杏賢拍拖，進擊龔嘉欣唔放手，兩人 keep住 WhatsApp調情。今年初孖住去馬拉宣傳，「感情」又升溫。
20/11
岑杏賢在 Ig宣布分手，第一句已露玄機，暗示多女埋身的男友冇安全感。一出 post，同袁偉豪在《城寨》合作過的張名雅答咀，撐岑杏賢決定。
同一日袁偉豪亦在微博「交代」分手。
小三慣匪龔嘉欣
今年初開始捲入多宗三角關係的龔嘉欣，多次被正印公開或曲線暗寸，上個月又被踢爆一度介入吳業坤及王卓淇戀情，令女方喊爆分手。
姣黐坤哥王卓淇喊爆
龔嘉欣跟吳業坤合作《愛．回家》初期傳出緋聞，原來當時跟坤哥有個地下情女友王卓淇，因發現龔同男友暖包兩份用，又挑機登堂入坤哥屋企拍埋片，忍無可忍的王卓淇最後喊爆提出分手。上月還公開說：「明知人哋有女朋友都黐埋去好過分。」曲線鬧小三。
扮同楊明二人世界
七月陳智燊跟宋熙年在英國結婚，有份做兄弟的龔嘉欣，被指刻意講大話，令人誤會她跟同是兄弟團的楊明雙雙飛英國二人世界，有指正印莊思明因而嬲爆，其 IG無端被人留言整蠱，莊思明指有人「吃不到的葡萄」，明顯寸小三冇得米。
人夫撐檯腳
今年七月，龔嘉欣被拍到跟富二代人夫郭俊豪撐檯腳後，雙雙返將軍澳屋企，有指人夫吼老婆返加拿大娘家，秘密約會龔嘉欣，事後她解釋男方去自己屋企攞嘢，又向郭太表示歉意。
張振朗正印合唱示威
除坤哥外，龔嘉欣又跟《愛．回家》另一男主角張振朗傳緋聞，她經常單方面 po相騷「恩愛」，搞到拍拖兩年正印陳芷尤忍唔住出手，在籌款節目《東華》合唱「天若有情」，向小三示威。
貌合神離隔開坐
本刊直擊二人分手前一晚（ 19日），當時緣盡已有跡可尋。台慶後，他們跟高海寧、唐詩詠和朱滙林去坑口村大牌檔食消夜，二人貌合神離面左左。岑杏賢成晚黐住唐詩詠，就算袁偉豪要求她坐在身旁，她都堅持隔開，令他非常冇癮。其間袁偉豪輕碰她手臂，岑杏賢更面色一沉。
之後洪永城來到，岑杏賢才無奈地讓座，焗住坐回袁偉豪身邊。雖然女友全晚對他不瞅不睬，但袁偉豪不停夾餸給女友，盡力討好。後來泰臣趕至，大家說說笑笑，岑杏賢面色才沒那麼難看。
樂瞳與袁偉豪拍劇集《宦海奇官》暗撻，有指他曾一度對她「車出車入」。
樂瞳和龔嘉欣本是好姊妹，但自從二人分別跟袁偉豪糾纏不清後，已經決裂冇姊妹做。
同龔嘉欣短訊調情
「袁偉豪本身多女埋身，佢仲唔識避忌，同人 flirt（調情）埋一份。你知有啲女仔好主動，見佢有反應就更加熱情。佢同黃智雯開工，一樽水兩份飲唔避忌，令 Jennifer（岑杏賢）好唔舒服。每次嘈親，佢就覺得 Jennifer小題大造，大家磨擦愈來愈多。」知情人說。
事實上，袁偉豪跟龔嘉欣和樂瞳的曖昧關係，是岑杏賢心裡的一條刺。
10月生日的岑杏賢，去年袁偉豪請來不少圈中好友，為她舉行派對，但今年生日，沒再放二人慶祝的甜蜜合照，更透露跟他少了見面。
袁偉豪愛揸機車，龔嘉欣投其所好跟他一齊學車，但他平日就會載女友去兜風。
今年五月袁偉豪生日，岑杏賢趁他沖涼時送上驚喜，曾經好恩愛。
龔嘉欣樂瞳反面
有樣有肌的袁偉豪多女埋身，同時又口花花愛撩女，令岑杏賢不滿。
「袁偉豪同龔嘉欣大前年拍《師父．明白了》，冬天喺大帽山拍外景，龔嘉欣好主動，拎埋暖包俾佢。之後就算袁偉豪同 Jennifer好穩定，佢哋都繼續來往，明知袁偉豪鍾意揸機車，龔嘉欣就投其所好，約佢一齊去學。好多人見過佢哋喺沙田駕駛學院附近揸車兜圈，情侶一樣。今年年頭同舊年年中，佢哋又一齊去大馬做嘢，兩個出埠更加放縱，返港後 keep住 WhatsApp互 flirt（調情），袁偉豪一句工作拍檔就想塞住 Jennifer把口，令佢更加唔開心。
「佢同樂瞳就拍《宦海奇官》熟咗，前年生日時，佢仲未同 Jennifer一齊住，樂瞳買蛋糕去佢屋企慶祝兼過夜，平日又過廠探班，做到好出面。樂瞳同龔嘉欣本來係好姊妹，成日喺 Instagram放孖妹相，但因為袁偉豪，大家冇 friend做，舊年已經冇乜來往。」知情人說。
好食得
袁偉豪 14年跟港姐岑杏賢拍拖後，形象愈變愈好成好男人模範，不過品性難移，被指令女友欠信心及安全感的他，原來多年來都「好食得」，緋聞女友氹氹轉。
落選港姐邱詠恩
06年落選港姐邱詠恩跟袁偉豪拍拖三年， 07年，公開表示害怕男友當選港男冠軍後會有女自動送上門。未幾袁偉豪先行變心， 09年拍《古靈精探 B》時，力追胡定欣。
欲斷難斷胡定欣
二人合作《古靈精探 B》時，當時仍是大茄的袁偉豪睇中胡定欣，不過胡卻睇中潛質股馬國明，做唔成情侶，二人卻成為親密「契兄妹」，經常相約跑步做運動，胡早前開生日 P，飲大兩杯的她更坐契哥大髀。《城寨》宣傳活動，二人不避嫌講有味笑話，契妹笑契哥「 PAT PAT細」，契哥又指可以擒（劇情）視後好幸福。
濕吻林夏薇
11年，新人林夏薇跟袁偉豪在《結婚@謊情式》做情侶，袁懶理女方有正印男友楊政楠，拍濕吻戲時戲假情真，之後被拍到二人撐檯腳，男方管接管送，但只有幾個月貨仔便告玩完。
肉搏舞台演員馬沛詩
10年參加舞台劇《我不要被你記住》，跟對手馬沛詩肉搏撻著，不過拍拖一年多，袁偉豪轉追林夏薇，幾個月後，甩拖的他又翻撻馬沛詩， 13年更公開表示開始儲老婆本結婚，但都係分手收場。
真正左右逢源
袁偉豪大大隻隻有女性緣，有唔少女性朋友，原來除了女人，連男人緣都好旺。 11年，富家子劉定成涉用裸照刑事恐嚇及非禮男藝人，案中被警方搜出超過六萬張猛男裸照，除了包括大批現役警員外，還涉及數位男藝人包括羅仲謙、港男冠軍高鈞賢及袁偉豪等。
據知，劉公子當時很想結識 07年的港男冠軍袁偉豪，更曾向他暗示有外快，雖最後成功約他拍照，但袁偉豪堅持著衫影相。對於被捲入案中，袁偉豪曾說：「試鏡影過有著衫的相，但感覺成件事怪怪哋，好似俾人呃咗隻豬。」
甲狀腺出問題
12年獲「最上鏡小姐」的岑杏賢是碩士港姐，跟袁偉豪拍拖三年，幕前演出唔算多，今年初更被發現身形愈來愈脹，原來岑杏賢甲狀腺出現問題，要食藥控制，在大台機會不多，大學主修巿場學的她亦為自己鋪定路，間中在大公司教班。
袁偉豪（英語：Benjamin Yuen Wai Ho，1981年5月11日－），香港男演員，現為無綫電視經理人合約男藝員，亦為TVB力捧新晉小生之一。
演藝經歷
袁偉豪中學時期就讀新法書院[a]，在當選1997年「Yes!校花校草選舉」校草後，他沒有繼續學業。他曾任人體素描模特兒，早於參選2007年度香港先生前已有不少幕前演出，由於演出機會漸少，所以亦曾當上送貨員。後來袁偉豪於2007年8月11日的香港先生選舉中勝出，成為冠軍。由於他於1998年曾演出維他奶廣告與簽約力圖唱片，故他於參選香港先生時，一直被報刊傳媒稱呼為「維他奶仔」。
他當選後一直以拍攝電視劇為主，但多以閒角或配角身份出場，至近年角色及戲份開始吃香及上位，更在2013年於TVB 馬來西亞星光薈萃頒獎典禮2013奪得「TVB最具潛質男藝員」及入圍「最喜愛TVB男配角」最後五強，並首度於2013年萬千星輝頒獎典禮提名「飛躍進步男藝員」。2015年再度於2015年萬千星輝頒獎典禮獲提名飛躍進步男藝員和憑《拆局專家》獲提名最受歡迎電視男角色。2016年因演出無綫電視劇集《鐵馬戰車》裡的「施馬」及《EU超時任務》裡主角。
感情生活
袁偉豪女友為2012年度香港小姐競選最上鏡小姐岑杏賢，他更揚言視岑杏賢為結婚對象[2][3][4]。於2016年11月20日，袁偉豪於微博宣布分手。
岑杏賢（Jennifer Shum，1988年10月9日－），香港無線電視藝員，擁有碩士學位，於2012年度香港小姐競選奪得最上鏡小姐、最佳首飾演繹大獎及時尚目光獎。