原本以為前晚《幕後玩家》22集，龔嘉欣俾小三挑釁，知道老公出軌已經好慘。
點知尋晚23集，更虐心……
龔嘉欣呢個好老婆嘅角色真系真系太好了。因為呢集講到佢竟然選擇原諒老公出軌。
對於好多女人嚟講，絕對無可能咁寬宏大量。或者話系蠢啦，一個男人出軌一次就一定會有第二次第三次……
從前，男人出軌，可能只有零和無數次。而家，幾乎只有無數次……
當一家三口去加拿大嘅途中，龔嘉欣見到黃宗澤對囡囡好好，於是心軟、大方原諒、不計前嫌、主動想重修舊好、打算兩人喺加拿大重新開始嘅時候——
黃宗澤呢個「世紀賤男」又再次傷害老婆嘅心！
黃宗澤向龔嘉欣表示，佢！唔！會！放！棄！小！三！Emma！
「我會繼續照顧Emma同佢BB，我唔會同佢分開……我真系唔忍心叫Emma落咗佢，個BB真系無辜。Sorry，我希望你可以理解。」
理解？點理解呀大佬？
原來呢一趟加拿大旅行，根本唔系乜嘢家庭之旅，而系黃宗澤藉機送走龔嘉欣母女，自己就可以同小三Emma喺香港相宿相棲……
黃宗澤竟然仲可以大條道理咁話︰「其實我真系好想你留喺我身邊……如果你接受Emma。」
喂喂喂，兩女共侍一夫喎，咁容易就接受架？
而又嬲又傷心嘅龔嘉欣，隨即想一巴打落黃宗澤度，不過又唔想驚動囡囡心心……
但想到以後要同心心兩個人相依為命，唯一可以做嘅，就系攬住個女爆喊！
呢集播出之後，黃宗澤俾觀眾插！到！飛！起！鬧爆佢系「人渣」、「賤男」喎……