前幾日，正義朋友破格成立專頁，以君臨天下式空降Facebook世界，風頭一時無兩！幾個鐘已錄得六千幾個Like兩千幾個Share，留言仲高達二萬段，個個留言用字生動三淺一深，全屬肺腑之言絕非五毛所為，我都有盡公民責任喺入面留言，不過好快就俾留言紅海淹沒，消失風雨中。
正義朋友之所以咁受歡迎，或多或少都同平時作風有關，就好似上排Uber惡鬥的士聯會，市民異好同聲群敺的士司機，都係因為各位的士大佬平時嘅個人化操守撩起社會聲音。正義朋友都一樣，再加上佔中期間高度配合市民同容忍示威者嘅世界級表現，形象已經被推上神檯，專頁嘅激烈情況已經有目共睹。所謂手臂延伸香港心，暗角打鑊冇死角，先敬個禮，Thank you Sir！
老實講，身為MK仔嘅我由細到大都過住提心吊膽嘅生活，細個嗰陣鍾意染頭髮，所以一行出街過兩條馬路就俾正義朋友截停一次，輕則查家宅重則搜全身：「咁夜去邊呀？」「頭先做過乜？」「支吉他用嚟做咩架？」通常我都係答：「阿Sir我係好人嚟架，你放過我啦！」大過咗之後鍾意揸街跑，所以一揸出街過兩條隧道就俾正義朋友截停一次，輕則查家宅重則搜全車：「咁夜去邊呀？」「頭先做過乜？」「架車有冇改裝呀？」我都係答：「阿Sir我係好人嚟架，你放過我啦！」老實講，喺香港地做MK仔真係唔容易，所以唔應該嘲笑我哋。
哲學啲講，人點解要長大，好大程度係因為個社會要你長大，例如讀書嗰陣要學走精面同埋堆，出嚟做嘢要學交際甚至刷鞋，我都為咗喺香港嘅行人路及馬路上面行得舒服啲順利啲而「從良」，恤返個黑色花旗裝揸返部斯文房車，自此果然路路暢通出入平安。你可以話依種情況叫「被馴服」又可以話係向現實低頭，但無可否認，警察自七十年代以後再度抬頭強勢回歸，重奪大權掌控黑白包攬民生，只要有違「現代駕駛科技應用」及「現代安全設計指標」嘅標準，你都唔會得閒，慘過做賊。
「我都想揸CL7重拾駕駛熱情！不過…唉都係唔講喇……」揸05年Wish嘅Ricky屋企仔細老婆嫩，每次車聚都哀聲嘆氣污雲蓋頂：「依個年頭仲揸到街車，真係一件好幸福嘅事……」自從佢架RX7同DC2相繼俾正義朋友捉咗去驗身又過唔到榜焗住賤賣之後，Ricky就一沉不起猶如一個不舉嘅喇，性情同取向亦180度轉變，由一個踭子過彎嘅熱情車手變成七人車阿叔，由車經可以連續講三日兩夜到依家淨係識自怨自艾：「仲FD2？唔喇…唔想再揸車揸到好似做賊咁喇……」唔少朋友感嘆佢俾正義朋友打沉咗馴服咗，但我認為，Ricky只係我上文所講嘅「長大」咗。
我揸過街跑，我好明白Ricky心深處嗰份無底嘅無奈同沮喪，當你愛車如命亦努力保持經典車本身嘅平衡同原著度，但都俾正義朋友當賊咁捉，眼見愛車俾粗暴嘅拖車佬吊走，然後收到一而再再而三「檢驗不合格」嘅告票，續唔到牌又買唔到保險，泊喺車場都要用車冚蓋住，好似收埋咗個黑市老婆咁偷偷摸摸，想同佢去街又怕俾人捉，想同佢結婚又冇證明，連收埋佢喺屋企都驚看更報串，去到依一刻你就會問自己：「咁辛苦嚟做乜？做乜要咁鬼鼠？做乜要咁勉強？」愛情還愛情，好似我哋依啲草民根本就冇辦法對抗揸住令箭嘅大勢力，你依家見到啲二手車網有大量掃把佬同紅梯拋售就知，香港地確實唔止我同Ricky曾經遭遇過夫之目前犯嘅傷害。
以前我都好似佢哋咁，日日揸住架戰車擔驚受怕茶飯不思，但自從換返部斯文大方、受盡外母歡迎嘅小房車之後，見到黑腳版正義朋友都再冇觸目驚心噗噗跳；夜晚路邊有Road Block都冇再被叫入Pit全身檢查，依家過住輕鬆愉快樂悠悠嘅生活，全靠香港警察 Hong Kong Police！正義朋友，多謝你！係你令我長大同覺醒，我會繼續遵守法紀，做一個守法嘅香港人，亦會多啲嚟你個Facebook Page留言架喇，敬禮！