唔單止身材惹火，個人都係咁惹火嘅袁嘉敏，成日俾人屈，指佢有做不道德交易。袁嘉敏話︰「我又唔明點解個胸稍為大啲就要做啲唔道德嘅嘢賺快錢。如果我有諗就唔使做演員，點解我要入行做演藝圈。點解我唔十年前做呢樣嘢。我唔明點解要有賺快錢思想。 點解一定要周身名牌，我真係唔係好明。」
至從喺《鴨王》一脫成名之後，大家都大讚佢身材好正，尤其是上圍更令唔死人流血不止。不過，困擾嘅事情就隨之而嚟，除咗被人瘋狂問價之外，就係有仲有電影公司借佢過橋，移花接木屈佢剝衫拍網片。前排大陸有一套網片《深夜咖啡館之少女失蹤》，入面就有場床戲，電影公司就出新聞稿以袁嘉敏做招牌，指袁嘉敏喺戲入面有激烈演出。袁嘉敏知道之後，搞到佢好鬼嬲!
佢話︰「其實我係做一個咖啡室嘅顧客。 另外啲情節係色情，佢搵第二個演員去做，話係我演就唔啱。喺海報見到我，但你唔可以用第二個演戲嘅演繹話係我。因為我都擔心佢演得唔好，到時人哋話唔好搵袁嘉敏，因為佢演床戲演得好硬。我就好無辜，人哋啲錯處我要承擔。」
被人屈拍床戲，亦有唔少人指袁嘉敏去從事不道德交易。佢助手更一度同網民開拖。「因為啲網民話我做不道德，咁佢就好嬲，因為佢同我一齊跑得好辛苦。我們啲錢是一個正常表演的價錢，唔係好奇怪個啲半個鐘頭有六七位數字。」
袁嘉敏更坦言身邊有人係做妓女︰「 其實都睇得出，全部東西都係一個女仔一份人工冇可能搵到，周身加埋都三十、四十萬。女藝人好多時出來都是T-恤牛件褲。我哋演戲唔代表做嗰啲。 佢地都認唔使做嘢，周遊列國，住頂級酒店，去最貴地方，一年去十幾次旅行，又冇番工咁樣。有人將演員諗複雜左，我哋啲咁嘅時間，我可能有半個月係大陸跑，如果有呢啲就唔使咁辛苦啦!我助手跟我一年，老咗好多，成頭都白頭髮。」
周身名牌唔使點做，又有得玩，呢啲生活袁嘉敏你唔響往咩? 「其實我覺得社會好歪曲。點解做妓女好正，周身名牌，生活無憂，呢啲係好事嚟咩? 我唔覺得呢啲係幸福。我都有一份正常收入，我又唔係完全一定要倚靠一啲男人先生存咁。」
有副好Body本應係開心，但係袁嘉敏就因為身材累事，經常被傳做不道德交易賺錢，甚至一度傳出淫照，搞到袁嘉敏每次提起都相當勞氣!
袁嘉敏話直至依家都有唔少中間人咬住佢唔放，明示暗示叫佢去搵快錢，袁嘉敏話真係好睏擾︰「有好多人纏擾，開頭扮係做嘢，之後會話你明嘅，你明嘅!我話我唔明，我做嘢每一個工作一定係要白紙黑字簽合約。就算去遠啲嘅地方，要搭飛機，我話我冇可能係無簽合約嘅情況下，帶個助手飛上去，又唔知你係邊位!之後佢哋話你嚟啦! 嚟啦! 我哋有人會接你! 」
袁嘉敏拒絕搵快銀，企硬所有嘢都要講清講楚。好似啱啱佢同黃一山拍戲，袁嘉敏一去到某啲可疑字眼，袁嘉敏都會同電影工作人員溝通清楚，唔想到時口同鼻拗。不過，估唔到最後竟然喺電影公司出新聞稿借佢個名去做宣傳，話佢喺入面有床戲演出。點防都防唔到，袁嘉敏呻好無辜! 「嗰個根本就唔係我嚟，喺電影公司嘅角度，佢咁樣攻擊演員係好侮辱咗我哋演戲嘅技巧。」