人生有唔同階段，不過自己總係最後一個先意識到自己已經進入某個階段，其中一個最明顯、亦係最多人拒絕承認嘅，就係變「師奶」。
女人結婚之後，好多時會否認自己係「師奶」，尤其比較早婚嘅，可能30未到，又點會肯認吖！
不過師奶與否，並唔係睇年齡架，係睇你心態。如果你發現你做咗「乜太」之後，有出現以下幾個「症狀」，恭喜你，你已經進入師奶階段啦！
開始愛上放工後煮飯
我知，好多女仔鍾意煮幾味，不過呢度講嘅係返完工返到屋企，然後仲會堅持自己煮幾味等老公返嚟食嘅。
從一開始買啲現成嘅餸，至後來自己去街市、超市買料自己煮；
從一開始3道菜，至後來4餸1湯，慢慢開始上手，
仲會話「出去食多味精呀」，你已經踏入師奶之路。
為咗幾蚊唔買住
為頭家，去超市買日用品是常識吧。不過以前後生時，買嘢幾乎唔睇價錢，見啱就買，但踏入師奶之路，會開始格價，
而且由於去得多，開始記得價錢，會識得等到價低、減低時先買。
例如買廁紙，就算屋企未用曬，就如果見到低位，就係咪都會買定先。
任何小事都極大反應
師奶最鍾意大驚小怪，小則驚呼，大則尖叫，非常擾民。尤其當自己鍾意同其他鄰居師奶一齊傾計時，一聽到咩Gossip嘢就高八度「真係架？」
完全就已經係師奶化咗一大半。再加埋睇到聽到乜就信乜再周圍講，唔自己去求真，咁就完成埋另一大半啦。
妝溶咗都唔補
以前最緊要靚，化咗妝就一定Keep住補。自從師奶化咗之後，開始無咁睇住自己個樣，有時熱到妝都溶埋，一於少理，開始唔注重自己儀容；
再演化落去就係著衫，開始著嘅鬆身舒服嘅衫，最緊要舒服多過好睇。