小妹同朋友A 識咗十幾年，每年都會去一次旅行，但上年 join 咗同佢三個朋友 (大家都係只識我朋友 A）一齊去歐遊後，再無聯絡。
旅行前已開一個 group chat 一齊傾或者 share 資料，臨出發前兩日，我朋友自爆佢地幾個有一個 group chat ，但我唔係入面，當然，有唔開心，唔知咩事。
到出發日去到機場，各自去閘口等，除了我朋友A 同佢個老死 B 一齊去閘，我地其他三個都各自去閘口上機。
去到人生路不熟嘅地方，我覺得自己好似自己一個去旅行咁，好多時都係自拍多。
試過大家一齊行去地鐵站，佢地突然話去另一個景點 （而昵個景點之前我話過唔想去），跟著同我講你唔想去，你自己去其他地方，夜晚係酒店見.......果嚇真係想喊出嚟，問自己做過咩事俾人咁對待.....但我要收起自己嘅唔開心，仲有餘下旅程要行。
到坐火車去第二個國家，我又好心幫另一位朋友 C 攞行李上車，點之自己差錯腳夾住大脾對落係車底，個嚇痛到眼淚水都出埋嚟，個朋友 C 好唔好意思係咁問我有無事，而朋友 D 攞咗藥膏俾我擦，真係痛到出唔到聲，但朋友 A （即我個 friend) 話咁唔小心、無咩大礙、皮外傷唧、一句，唔係喺半句都問我點樣。
返到香港睇跌打，醫師話都嚴重嚇，咁遲先去睇佢。
當然，返嚟後大家都無搵大家，但自己係度諗點解會攪成咁？以前每日都會幾次聯絡、多數都係佢問我公事上嘅嘢，依家一個電話都唔會有。
大家有無試過咁嘅經歷？