「千億媳婦」徐子淇（Cathy）與老公李家誠一同出席智行基金會慈善籌款晚宴。Cathy身上戴上由英皇鐘錶珠寶贊助的首飾，包括手上的8卡鑽戒，全身鑽飾合共逾100卡，價值超過1,700萬港元，貴氣十足！
作為基金會大使的Cathy，代表基金會接受護膚品牌所捐款的100萬支票。Cathy透露基金會每兩年辦一次籌款晚宴，但由於經濟不景氣，令籌辦活動更辛苦，她說：「好難搵贊助，半年前都仲未知搞唔搞得成，唔知點好。不過好彩我哋冇放棄，繼續努力，慢慢搵到贊助，仲多過以前。加上今晚，應該可以籌到500萬，可以令1,500個小朋友讀到書，對佢哋好重要，改變到佢哋人生。」
提到早前二人被拍得到美國旅行預祝結婚10周年，Cathy指該次只是暑假跟小朋友旅遊，並非慶祝結婚周年。問到12月15日結婚10周年的二人打算如何慶祝？李家誠說：「我哋會同啲熟啲嘅朋友一齊慶祝，未必喺香港。」在旁的Cathy即說：「佢搞。（大搞？）唔系，自己慶祝。」再追問二人如何慶祝？李家誠依然封口，並指希望保留少許神秘感。問他準備了禮物沒有？Cathy即代老公解圍說：「我未喎。」
提到二人外游時被拍得情到濃時接吻，Cathy即笑言：「好尷尬，好多朋友打嚟笑我的。其實我的平時喺香港小心啲，喺外地relax啲，冇諗過會有人認得。可能去主題樂園多中國人，所以就有人認得。（喺街外戒親熱？）我哋都好少好親熱，正常兩公婆會做嘅事，冇乜野。依家好多人可以影相賣畀報館，所以多咗人影，不如有人影咗我之後賣番畀我，我畀多少少（酬勞）。（厚酬？）哈哈！」
問Cathy會否再追第五胎？她笑言：「冇啦，唔生啦，夠啦！湊小朋友好花時間，我今次搞呢個慈善晚宴都少咗時間陪BB（孻仔李建熹），我哋連場內布置都自己做，好花時間，好期待完咗活動之後多啲時間陪BB。」她又提到孻仔剛一歲生日，當天一家人慶祝兼吃蛋糕，她說：「嗰日畀咗BB食蛋糕，因為平時佢冇cream、蛋糕食，佢嗰日好開心。」