聽說最近陳展鵬想用續約來一圓視帝夢，其實今年他演的《城寨英雄》爆紅，看來要登上視帝都沒什麼競爭吧？
不過年年都有傳小生用續約換視帝，但林峯、馬國明不也是年年沒收獲。
到底怎樣才可以做到視帝呢？
不如看看3位拿得最多視帝的最佳男主角是怎登上寶座：
1. 羅嘉良－出色劇本（當然唔少得好演技）
羅嘉良（撈家）好戲就人人皆知，之但係就發揮到好演技，出色嘅劇本係好重要架。撈家入咗TVB之後，正正係電視界嘅黃金時代，出色嘅劇本多到數唔哂，好似《誓不低頭》、《義不容情》、《火玫瑰》、《天地男兒》等，撈家都有份出演磨練演技。
而撈家在懷舊喜劇《難兄難弟》飾演李奇（影射呂奇）一角奪得視帝，除咗因為撈家做得入型入格之外，劇本用幽默方式去講60、70年代嘅娛樂圈，播出嘅時候又咁啱橫跨同見證咗1997年香港主權移交，就好似將新舊香港做對比咁，當然受到大眾歡迎。
之後撈家又出演戚其義擔任監製嘅1998年劇集《天地豪情》，雖然走嘅係傳統家族情仇劇，但有62集就可以慢慢塑造一個立體嘅人物，令演員有好大發揮機會。當然撈家演技一流，將草根小人物卓尚文做得活靈活現，令佢再奪視帝。
當然不能不提撈家第三次拎視帝嘅劇集《流金歲月》，雖然睇落好似又係啲家族情仇劇，但劇本反而成日圍繞啲配角，反而帶出特別嘅一種有共鳴嘅情，就係生活中種種無奈。出色嘅劇本，加上撈家又將丁善本嘅完美中嘅不完美演繹得好好，當然再奪視帝啦～
2. 黎耀祥－由配角浸淫演技
以前從來都唔覺得黎耀祥有主角樣，因為黎耀祥做親都係配角，但唔少都令人有深刻印象，甚至搶過主角風頭，好似《西遊記》嘅豬八戒、《楚漢驕雄》中飾演韓信一角、《秀才愛上兵》中扮演一名為民請命嘅青天狀師戴從文咁，忠奸、搞怪角色都Handle到。
一做就做咗20幾年配角，出色嘅演技一早獲得認同，而黎耀祥亦因此累積到唔少觀眾緣。
所以一可以做第一男主角，當然就可以盡情發揮浸淫多年嘅演技啦，無論係《巾幗梟雄》中大鳴大放嘅市井人物柴九、《巾幗梟雄之義海豪情》中沉鬱嘅劉醒、《大太監》入面心思縝密處事謹慎、忠心不二嘅李蓮英，黎耀祥都做到入形入格，畀人知道佢唔係只係得一種戲路，所以咁就成為咗三屆視帝，實至名歸。
3. 郭晉安－挑戰高難角色
郭晉安憑劇集《戇夫成龍》，飾演智障嘅「阿旺」丁常旺一角，拎咗佢人生第一個視帝。要飾演智障人士真係一個高難度挑戰，因為如果做得過火，好容易會畀人感覺好造作，做得唔好又會畀人話侮辱弱智人士。不過郭晉安就拿捏得好好，將弱智人士嘅天真無邪一面呈現出嚟，令唔少觀眾都非常喜愛「阿旺」。
之後佢再喺劇集《阿旺新傳》挑戰「阿旺」一角，不過今次就係現代版，由於更貼近現實生活，如果細節有誤會好容易畀觀眾發現，所以相對上亦都較難。
但郭晉安憑住精湛演技，再次演活「阿旺」，成功再奪視帝。但連做兩次「阿旺」，令到唔少觀眾對佢有刻板印象，為咗有突破，郭晉安開始挑戰反派角色，仲要係一反TVB奸角終必懺悔嘅傳統。就好似佢喺劇集《忠奸人》就做表裡不一，到結局都無悔過嘅反派角色高哲行，演技得到大眾嘅認同，再奪視帝。