正所謂「兄妹真有趣，不需要分居，忘記輩份再追……」馬國明與唐詩詠呢對契兄妹多年來關係糾纏不清、曖曖昧昧，就算詩詠年半前與洪永城(Tony)拍拖，黃金筍盤馬國明仍在契妹身邊守候，唐詩詠亦樂於周旋契哥和男友之間爭風押醋。早前三人在楊怡、羅仲謙婚宴上碰頭，兩男一女碰頭得個嬲字，情敵見面更大力碰杯兼有言語衝突，婚宴現場頓變成戰場！
上星期日，怡謙大婚假六星級Ritz Carlton酒店舉行， 馬明和詩詠擔任兄弟姊妹團，攞正牌由接新娘到送客對足全日，九時半先到達的Tony當然眼火爆！據現場賓客透露，終於得閒的詩詠坐埋Tony度唔夠五分鐘就被 馬明 帶走去敬酒，Tony個面口即時鑊燶咁黑，坐喺度自隊紅酒！
其後成班兄弟姊妹跟住對新人逐檯敬酒，去到Tony嗰檯時，情敵 馬明 竟然主動同Tony敬酒，擺明系挑機！本來Tony轉身想閃，但後來就轉過頭大聲講︰「嚇？邊位呀？啊﹗飲杯﹗」然後將手上杯酒大力撞落馬明隻酒杯度，搞到啲紅酒濺左出 馬明 隻手度，爭啲爆杯！
馬明當時黑面離去，而詩詠就勁嬲咁厲住Tony，幸好有豹哥(單立文)打圓場先令氣氛緩和番！事後馬明接受訪問，對於與Tony在婚宴上開火，佢就例牌否認，不過語帶雙關指和洪永城可組「情敵檔」，直認二人系情敵關係！
至於Tony方面，佢一聽到記者提起馬明就勁大反應︰「點解無端端問我同馬明？」，又自曝有結婚打算。但明明詩詠早前揚言冇計劃，等個天安排。到底系二人未有對口供，定Tony未凼番掂女友呢！