樓市屢創新高，偏偏樓價癲，買嘅人仲癲。
於是就出現「無論乜樓都係搶」嘅局面，最新當然要數四叔位於南昌嘅新盤，當中震驚13億人嘅600呎4房，同400呎3房都畀傳媒報足幾日。
每間房只有40呎，比黃之鋒剛喺泰國被扣留嘅50呎臭格仲細。
加埋之前何文田嘅150呎劏房新盤真係不禁倒抽一口涼氣。不過你笑佢癲咩，偏偏大把有錢人買，你都奈佢唔何。
瘋狂並唔可怕，最可怕係習慣咗瘋狂；當香港人開始接受「生活只需要有150呎空間」、「一間300呎樓係應該值400萬」。
當一切唔合理變成合理化，一切瘋狂變成常態化，原來正常嘅人先係唔正常。
日前本港有一個關於室設計嘅比賽，主辦單位係香港建築師學會，而且聯同房協及青協合辦。
設計啲咩？原來係「如何解決年輕人愈住愈細」嘅問題，而比賽就係各隊要喺要用一個實用面積150呎、高3.7米嘅單位，設計好「適合」人居住嘅環境。
睇到呢度，終於都知，根本政府、發展商、甚至青協其實已默認咗呢種劏房係常理，所以要解決嘅唔係點樣可以起大啲，而係點樣喺呢度住得舒服啲。
而冠軍團體嘅設計更加令人嘆為觀止，就係將床設喺廁格之上，呢個「廁下床上」嘅設計，聲稱利用「共住」概念，並以「巧妙」嚟形容。
喂！呢個設計人哋Purple姐姐幾年前已經用咗啦，喺佢個工人房吖嘛！
估唔到當年惹起民憤，人家都話Purple姐姐「無人性」、「唔尊重人」，事隔幾年，原來呢個就係解決年輕人居住問題嘅方法。
呢個世界唔係唔正常，只係全部都係Purple姐姐啫。